Kua Moe

A Kereihi Tarapuri, he rangatira kaumatua o Waikato, no te 23 o nga ra o Hune. Ko te pukapuka tenei a tona hoa a Wireru Te Wheoro, e mea ana, "No tona tatanga ki te mate, i te tekau ma rua o nga haora o te ata, ka tahi ka maranga ki runga, ka tahi ka titiro ki te ao rere mai i roto i Waikato; ka tahi ka huri te titiro ki te wai o Waikato; ka roa te tirohanga, ka puta tana mihi—'Hei konei ra e te ataraogi i Waikato! Hei konei ra i Waikato, hei konei ra i Taupiri Hei konei ra e nga iwi! Kia mau ki te atawhai!' Ka mutu tana poroporoaki, ka tahi ka moe. * * * He tangata e manaakitia ana e nga iwi katoa o Waikato. Kahore hoki he kino mana e kitea ki runga ki nga iwi, ko te pai anake, ko te pehi i te kino."