Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngatiporou. No. 2
Na Ngatiporou. No. 2.
E koro, e te Kawana,—
Tena koe! Tenei o matou whakaaro ka korerotia atu ki a koe. He whenua to matou e warewaretia ana e te Kawana; ko te wareware tenei, kahore ano he Kawana kia tae ake ki to matou Whenua, ki Ihikepa, a tae noa ki a koe e tu nei. Ki ta matou whakaaro, me tirotiro katoa nga tangata i tonoa mai ai koe e to tatou Kuini hei tiaki.
E koro, e te Kawana, erangi to hoa a te Pihopa e tae ake ana ki a matou; ko koe he tangata mangere koe ki te tirotiro i a matou, no te mea ko koe to matou kai tiaki, to matou kai atawhai.
E koro, e te Kawana, tenei tetahi kupu mo te Kingi Maori. Tenei to matou whakaaro: ma ma, ma pango ka tika, ma pango anake, e kore e tu. Ka mutu enei.
E koro, e te Kawana, kei roto katoa matou i te maru o te Kuini: ahakoa tera ano era mana whakahaere o te Atua raua ko te Kuini, ko nga Minita. E whae, e te Kuini, tena ko koe! Tenei hoki matou kua tae mai ki tau karanga; ahakoa ka rongo nei matou i au kupu hei maunga atu ma matou ki runga ki to matou iwi ki Ngatiporou.
E koro, kotahi to matou mahi, he tohutohu anake i to matou iwi kia noho pai, kia noho tika i runga o te whakapono ki a te Karaiti. Tenei hoki tetahi: na te mate i whakararuraru nga korero a te Kawana. Meheme he ora tena e marama.
page 51E koro, e te Kawana, e kore matou e pai ki te Kingi Maori—me waiho ki a ratou to ratou Kingi. Ko te whawhai a Wiremu Kingi raua ko te Kawana, me waiho ki a raua ta raua mahi. Ka mutu ena.
E koro, e te Kawana, nau ranei te tikanga ki nga Pakeha o to matou kainga kia kipitia te moni mo a matotu kai, na ratou ano ranei? Ko to matou mate tenei; ko a matou kohikohi mo matou Minita, he kore moni; no te mea e kipitia ana te moni e ratou. Ka nui to matou pouri ki nga Pakeha o to matou kainga.
E koro, e te Kawana, mau te aroha ki aku korero, no te mea kua aroha ahau ki tau karangatanga ake i au.
E koro, e te Kawana, tena ko koe, korua ko to taua Kuini atawhai. Heoiano aku kupu ki a koe.
Na Wiremu,
Na Wikiriwhi Matehenoa,
(O Wharekahika.)