Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Share:

Na Parawhau. No. 1.

Tena koe! Ko taku kupu tena ki a koe kia matakitakina e koe. Ki te mea e kore e tika, ahakoa ka puta ki tou aroaro. Na, koia tena, kua timata koe ki te whakamarama i nga tikanga ki a matou, ki nga rangatira Maori, me penei tonu e koe i roto i nga tau. Ki te mea ko tenei ra anake, i roto nei i te tau 1860, ko konei mutu ai te whakamarama i tenei kanara ka tiaho nei ki roto ki tenei whare pouri. E mea ana ahau e ohooho ranei, kahore ranei; koia ahau i mea ai, peneitia ano e koe i roto i nga tau. Kei wawara ke enei hipi kua whakamine nei ki ou pakau, ki o korua pakau ko te ture. Heoi ano tena kupu.

Na, tena ano tena kupu aku ki a koe. E mea ana ahau me whakauru etahi Maori o Ngapuhi hei hoa rapu i nga ture whakawa, i nga mea katoa e kitea ana e te runanga, Kia uru tetahi Maori tika ki aua mahi. Heoiano tena. He kupu ke ano tenei, ko te hoko whenua. E puta iti ana ki a matou te utu o te eka. Ko te utu tenei mo te wahi pai, erua hereni, mo te wahi papaku, he hikipene. E awangawanga ana te ngakau, e ahua kino ana ki tenei utu. Heoiano tena kupu.

He kupu ano tenei. E pa, e te Kawana, rapu noa ahau i tetahi he i roto i au kupu, a kihai ahau i kite. Ko taku tenei i kite ai; na, ko tenei whitiki kua whitikiria nei e koe ki anei rangatira Maori. Kia ata whakaaro koe ki te matauranga o tenei runanga. E kore hoki tenei whitiki, e kore hoki tenei paere e motu; penei he whitiki pongi tenei ka oti nei te paere ki anei rangatira, e motu; tena ko tenei, he whitiki koura, ka mea ahau, e kore e motu. Heoi ano tena kupu.

Na, he kupu ano tenei. I whakatapokoria page 11 nga kupu o te Tiriti i Waitangi. Koia ahau ka mea nei kua uru tahi Ngapuhi ki raro ki ou pakau, kua pena me te heihei. Na ko ta Heke te mea i hipokia ai aua kupu i Waitangi, otira e hara tera, he purepure rere rawa ia nga toetoe o taua whare. I muri iho katohia ano, na, kua pai ano, kua ora ano nga taonga o taua whare; na, kua puaki nei i a koe i waenganui o tenei runanga nga taonga a Kawana Hopihona i tuku ai ki te Tiriti ki Waitangi. Heoi tena reta.