Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Share:

Na Ngapuhi. No. 2.

Tena koe! E nga Pakeha, e nga Maori, page 9 whakarongo mai! E rapu ana ahau i te he o Kawana, a kahore i kitea e ahau, i nga po, i nga ra o tenei runanga. He whenua ranei te he o Kawana? Kahore. E teka ana tenei kupu, inahoki he mea whakawa marire a Te Makarini raua ko Te Henare Kepa hei hokohoko whenua. E pena ana me nga toa e hokohoko ana, waihoki, ko nga whenua; na nga tangata Maori te hiahia ki aua Pakeha kia tukua te whenua, e hara i te mea tango e aua Pakeha e Kawana ranei; kahore. He hiahia ano na te ngakau ano o te tangata kia whakaturia tenei Kingi Maori, e kore e tika; na te whakapehapeha taua ritenga. Ko te maru o te Kuini, kia hoki ki raro, kahore, e kore e hoki ki raro te maru o te Kuini, na te mea hoki kahore he Kingi o tenei motu i mua, he rite tonu nga rangatira katoa. I tenei takiwa ka rapurapu o ratou whakaaro kia hoki te maru o Kuini. E teka ana; pera hoki me te taenga mai o te Kawana Hopihona i te taha hau atiu ki Peowhairangi, ki Waitangi. Ka mea a te Kawana Hopihona kia hoki ia ki Ingarani. Ka mea nga rangatira katoa, katoa, Kahore, me noho koe i Peowhairangi." Na Hone Heke i whakaae, muri iho kua tae Hatana ki tona ngakau. Ko te kara, ko te Pakeha. Ka whakatika a Te Waka, ko Heke; no muri ka tahuri te Pakeha ki a Heke ka whawhai ratou ko Te Waka ma ki a ia, kihai roa ka mau te rongo; kihai penei me ta Te Rangitake, he mea kohuru tana tikanga. E he ana tenei. He hara nui tenei ki toku ngakau; e ngaruru ana toku matenga mo tenei mahi. Pera hoki me te he a Ngapuhi ki te Pakeha i Matetakahia; ka mate te Pakeha, ka whakatika a Te Waka, ko Matetakahia, kahore he aha a Ngapuhi. I mua atu i namata, he hapu ke na ratou te hara, tahaetia ana, oma ana ratou ki tawhiti, whakatika mai te Pakeha ko oku tupuna, mate rawa ko Moira, ka whakatika au ko te Pakeha, ka whakatika oku tupuna ko te Pakeha; ka whakatika a Te Waka, ko Kiri, kahore he aha a Ngapuhi; heoi ano enei hara ka kitea e au; e hara i te Pakeha te hara, na te Maori ano te he, na Ngapuhi. Heoi ano enei kupu.

E hoa, e Kawana, e kore au e pai ki tenei Kingi Maori, ko taku pai tera kia whakahonore au ki a Kuini, ki a Kawana hoki. E matauria ana e au au kupa. E mea ana hoki koe kia tau te rangimarie ki runga ki te maru o te Kuini, kia noho tika. kia noho pai ki runga ki te maru kotahi. E tika ana kia murua au hara. Tenei taku whakaaro mo tenei huihuinga. E mea ana matou kia page 10 oati pono a matou kupu. Tirohia enei kupu e koe. Ki te whawhai korua ko Te Rangitake, ki te peke tetahi tangata o roto o tenei huihuinga ki roto ki a Te Rangitake, kua he enei kupu, e ki nei te tangata, haunga ahau, te taha ki Ngapuhi, ko te moe matou, ake ake. Amene.