Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngapuhi. No. 1
Na Ngapuhi. No. 1.
E kara. e te Kawana,—
He kupu ano tenei mo tenei kupu au e mea nei, ko nga whakaaro kino kia puta atu ki a koe. Kia rongo mai koe! Kahore hoki he kupu e mea atu ai ki a koe. Heoiano te kino e puta i tenei taima he pokanoa na te Maori ki te moto, na te Pakeha ki te moto. Heoiano, e pai ana tenei he; tena ko te Kingi Maori, he kino tenei, na te mea e pehi ana i te maru o te Kuini. Kahore, e kore te temepara nui e pau i te whare Maori, no te mea he whare nui te whare Pakeha; tena ko tenei, e kara, e te Kawana, kia rongo mai koe! "I taku tamarikitanga, e whakaaro ana ahau me te tamariki; kua whakatupu tangata ahau ka whakarerea e ahau nga mea tamariki." Kati taku ki a koe.
(He Waiata tenei.
Kaore te aroha,
Ka totoko noa mai,
Wairua o Kuini
Ka wehea i ahau.
Wai te teretere
E rere i waho ra,
Nou na e Te Kohu.
E hoki koutou,
Ripa ki te whenua
Ki Maketu ra ia.
Tenei matou kei runga i te toka,
Me rauihi noa ki te wairua a kau,
Te waka rae i tataia mai
Toroa i te wai,
Kia pai atu koe.
Haere ki raro ra,
Ki Hauraki ra ia,
Hei matakitaki
Ma te nui a Timaru !
Nei ka pae noa ki Akarana raia.
Na Wiremu Te Tete,
He Kai-whakawa,
No Waikare, Peowhairangi.
Ki a te Kawana.