Proceedings of of the Kohimarama Conference, Comprising Nos. 13 to 18 of the "Maori Messenger."

Nga Korero A Potatau Ki Tona Runanga

Nga Korero A Potatau Ki Tona Runanga.

Kua homai nei kia taia ki tenei nupepa nga korero a Potatau ki tona Runanga kaumatua, (he mea tuhituhi na te tangata Maori); ara, i tona Runanga i te marama ra o Mei. E marama rawa ana nga korero a taua kaumatua, ko tana tikanga hoki he ngakau pai ki nga Pakeha o tenei motu:—

Ngaruawahia, Mei 26, 1860.

Na Potatau enei kupu i korerotia i to ratou nei runanga anake—i te runanga kaumatua:—"Hei aha te aha, hei aha te aha; engari kei taku nei kupu, kei ta te tutua, he pai, he atawhai anake. Ko tenei, ka nui toku aroha ki a te Kawana, ara ki te Pakeha. He aha tena e tu na? He peihana. Koia tena. Ko tenei, e Wi, kahore he tikanga. Ko Wetere, ko Apihai, nga uri o te Horeta o Tawhia. Ka mea tenei tangata, a Tiriwa, he tikanga tana. Rere! te mahi o tona tupuna he mahi roi, me Te Waitere, he mahi roi ta raua ma Te Whatakaraka. Ko tenei, e Wi, ka nui toku marama ki a koutou ka tae mai na. Heoi ano, ka ora toku ngakau ki a Apihai, ki a Wetere, ki to whanau. Rere! he kiri kei waho, he puku kei roto." [Te ritenga o tenei kupu ko te kiri e kitea atu ana, e rite tahi ana, ko ana whakaaro e rere ke ana.]

Ka ki mai a Porokoru, "E hoa, tapahia atu taku pane, hei oko wai mou, ka mau atu e koe."

Potatau: "E Wi, kahore he tikanga. Ko Apihai, ko Wetere, kei toku uma, ko au te pane, ara ko taku i mohio ai, ka ki te tangata he mohio ia ki te mahi, kahore, e Wi. Rere! ko nga wheua anake tenei, ko nga kiko kei a korua ko to teina ko Apihai Te Kawau. Whakaaroa mai iana e koe e Wi. Ko tenei waka, ko Te Hapupararaki te ingoa o tenei waka, he waka no Tapaue."

Ko nga ingoa enei o nga tangata i rongo i enei kupu, ara:—Ko Apihai te Kawau, ko Wetere Kawae, ko Paramena Te Ruamutu, ko Te Reweti Tamahiki, ko Te Paenganui, ko Wiremu Hopihona, ko Te Warena Kiwi, ko Te Raku, ko Potakirau Mahu, ko Arama Karaka Te Aho, ko Porokeru Titipa, ko Paratene Te Maioha, ko Maka Te Nahu, ko Te Katea Taharape, ko Te Warana Te Ahukaramu, ko Tarahawaiki, ko Koniria Ketokiwaho.