Pire Pooti Mema, 2 p.m.

T. Tepanau—e mea ana ahau ko te tumuaki mo te Kotahitenga me tango i roto i te tai Hauauru.

H. Heke—Ko tenei timuakitanga i timata mai ia Ngapuhi ko Heta Te Haara a koia tonu te kai whakapuare i te Paremata i runga ano i tona timuakitanga a ka mate atu aia ka hanga ho ritenga ka tu ko Henare Tomoana hemea paahi mai i te hui i te waipatu a nana i whakapuare te hui i Pakirikiri a no reira i whakamana a Pene Taui, na reira i riro ai mana e whakapuare tenei Paremata e noho nei i Ohinemutu ko tera ahau nohoanga kaore he korero he pooti ranei heoi ano tana he noho noaiho.

R. Wharerau—Kaore i tino marama te Motini a te Runanga Ariki notemea kaore i whakaingoatia mai he tumuaki e te Runanga Ariki mo te tau e haere mai nei a hemea ahua pouri ano tenei ki te ngakau i te patunga mai i te Ripoata o tenei whare notemea hemea pai ano hei te Paremata e haere mai ka kokiri mai ano he Motini whakatu tumuaki mo te tau 1896, no te mea ekore e taea te panga te korero mo tenei take ki waho ki te marae Engari me mahi e tenei whare e hara i te mea he manawapa noku i tana hinga kei riro i te tahi atu tangata engari he whakaearo ki te take i paahitia atu e tenei whare, kua patua mai, ra, a e hiahia ana ahau me whakahoki ano te Ripoata nei kia mahia ano e te Runanga Ariki.

H. Tomoana—E mea ana ahau me whakahoki ano te Ripoata nei kia mahia e te whare Ariki no te mea ko aua tangata heoi ano tana he whakapuare a he korero hoki i nga mea etuhia atu ana e nga Minita.