Tunga tua whaa o te Paremata o te Iwi Maori o Aotearoa me te Waipounamu nga motu kua kiia nei ko Nui Tireni.

He panuitanga tenei ki a koutou e nga Iwi e nga Rangatira e nga hapu e nga tangata katoa o te Iwi Maori.

Me titiro koutou i tenei pukapuka ma kona koutou ka marama ai ki nga tikanga o nga whakahaere o nga ritenga pooti mema mo tenei pootitanga e haeremai nei o te tau 1896.

Me nga ritenga kohi moni me nga ritenga whakahaere i nga pukapuka kirihipi me nga Iwi kua uru mai ki te Kotahitanga me nga Iwi kaore ano, me nga korero a te Kotahitanga i Te Kauwhanganui o te Kiingi Mahuta me nga korero a Te Ngakau o te taha ki te Kiingi.

Me nga korero timatanga o te urunga mai o te Iwi nui tonu o te Arawa ki roto i te Kotahitanga me nga korero katoa o te tunga o te Paremata i Rotorua me nga korero o te urunga mai o te Urewera ki te Kotahitanga.

Me te Pire a Rangitane me Ngatimutuahi i paahitia e te Paremata i Rotorua mo o ratou whenua me era atu ritenga kei roto i tenei pukapuka.

Hei kona ra koutou e nga Iwi noho mai ai, kia kaha mai ki te hapai i to tatou tikanga ko te take i roa ai te perehi i enei pukapuka. He ao te rangi ka uhia, he huruhuru te manu ka tau, Na to koutou hoa.