[ko te tohutoro i roto i te reo Pākehā]

[Translation.]
(Nama 1) Pukapuka-inoi a Rairi Rangiheuea me etahi atu e 3.

He pitihana tenei na te hunga e whaitake ana ki Himatangi Poraka i Manawatu, e tono ana kia utua etahi moni o nga reti i tangohia e te Petatone i te mea e whakahaere ana ia i te hoko o te Poraka o Manawatu Rangitikei. Ko etahi o aua moni reti e kiia ana i tika kia utua i runga i te riiha a te Ropitini i taua Poraka kaore ano kia utua ki nga tangata e whaitake ana ki taua wahi. E tono ana hoki kia utua te moni itareti i runga i aua reti.

E mea ana to koutou Komiti i te tau, 1864, i te mea e tu ana a te Petatone hei Komihana hoko whenua i herea e ia nga reti o nga whenua i roto i te Poraka o Rangitikei-Manawatu, i te mea e whakahaerea ana te hoko o taua takiwa.

Ko tetahi o aua riihi na Kapene Paraki Ropitini mo tetahi whenua ko nga rohe e ahua rite tonu ana ki nga rohe o Himatangi, e rite ana hoki te rahi o aua whenua, ko nga moni o taua reti i te wa i oti ai te hoko o te Poraka nui o Manawatu-Rangitikei i tae ki te £500 (rima rau pauna).

Ko enei tangata e whai-take nei ki Himatangi i raro i te Karauna Karaati, ko aua tangata ano ko nga kaiwhakakapi ranei o aua tangata i whaitake ra ki Himatangi i raro i nga tikanga Maori. Ko taua riihi kia te Ropitini i hainatia e etahi o nga tangata i whakaritea e to ratou hapu i whai take ra ki taua whenua i raro i nga tikanga Maori.

Kahore i whakaae te hunga e whaitake ana ki taua whenua ki te hoko o te Poraka o Rangitikei-Manawatu, wehea ketia ana o ratou paanga i te wa i hokona ai taua Poraka.

Ko nga reti o te riihi a te Ropitini i utua tonutia ki te hunga i whaitake ki taua whenua i runga i te tikanga Maori i mua atu i te herenga o aua reti.

I te 17 o Oketopa, 1869, i karangatia he hui e te Petatone Komihana Hoko Whenua kia tu ki Rangitikei, kia utua ai e ia nga reti i herea e ia, a utua ana e ia i runga i te huarahi kua whakaritea e ia, tukua ana aua moni me nga hua tae aua ki te £4,699, ki nga iwi o Rangitane, Ngatiapa, me enei hapu o Ngatiraukawa, ara—Ngatikauwhata, Ngatiparewahawaha, me Ngatikahoro.

Ko te hapu o nga Kai-pitihana kaore i uru ki nga hapu e toru i utua ra e te Petatone, engari he hapu ke ratou nei no Ngatiraukawa, kaore hoki etahi o ratou i tae atu i te 17 o Oketopa, 1869, ki taua hui kaore hoki ratou i tango moni o aua reti.

Ko nga pukapuka i te tari o te Minita mo te taha Maori e whakaatu ana i te utunga o nga moni katoa o aua reti me te £500 hoki o te riihi a te Ropitini e £66 anake e toe ana kia utua, engari kaore he ingoa o nga tangata o Himatangi i roto i nga pukapuka whakaatu i te utunga o aua moni.

I te wa i whakaritea ai ki tukua he Pire hei whakahoki i Himatangi ki nga tangata e whai take ana, i whakaae a te Pura te kai-whakahaere mo te taha ki nga Maori kia kaua e utua aua moni o nga reti i te mea ka whakahokia taua whenua, ko enei k [sic] pu e whai ake nei nga kupu i roto i taua Pire i te tukunga mai ki te Kaunihera i whakakore i aua utu reti: "Me kaua e utu nga reti, nga mea e puta mai ana, nga oranga, me nga moni rima rau pauna ranei i utua ki te Kawanatanga o te Porowini o Poneke, me nga hua ranei i runga i aua moni." Whakakorea ana e te Komiti aua kupu o te Pire, ki ana a Te Porena te Minita mo te taha Maori o taua wa, me wehe ke taua tono reti me te tino putake o te Pire.

Ahakoa te whakaae o te rarangi matua korero o te Pire ki te whaitaketanga o nga Kai-pitihana ki Himatangi, na te tohe ano o nga Kai-pitihana, me te pau o a ratou moni katahi ano ka hoki te whenua kia ratou.

No reira ka tono atu to koutou Komiti kia utua katoatia e te Kawanatanga nga reti i herea ra me nga itareti i runga i aua moni, kia ata whakaarohia hoki e te Kawanatanga i runga i te ngakau aroha me te ngakau nui mehemea ranei e tika ana kia utua nga moni a nga Kai-pitihana i pau i runga i ta ratou whakahaere i o ratou take.