E pai ana ki to Rangatiratanga.

Ko maua e mau nei i te Komihanatanga a Te Kuini hei whiriwhiri hei ripoata i etahi take e pa ana ki te hoko whenua i Te Waipounamu motu o Niu Tireni, ka whai kupu atu i konei mo reira.

Kei te mohio hoki koe e te Kawana i tukua mai tetahi Komihanatanga ki a maua i te marama o Pepuere, 1879, i raro i te ringa o te Makuihi o Nomanapi Kawana me te hiiri o te koroni o Niu Tireni. Ko te kupu i roto i taua Komihanatanga kia tahuri maua ki te whiriwhiri i etahi take e pa ana ki nga whenua o Te Waipounamu, Niu Tireni, i hokona i nga tangata Maori nona aua whenua—a kia whai ripoata mai maua i runga i aua mea i roto i nga tau e rua timata mai i te ra whakaturanga o taua Komihana.

A e mea ana hoki maua kei te mohio koe ko te whakahaere a maua i te mahi i tukua mai i runga i taua Komihana i araitia i whakamutua e Te Paraihe Minita mo te Taha Maori. Na, tena ano ta maua reta mo runga i tenei mea i tukua atu ki te Kawana i tu i mua ake i a koe ki a Te Ropihana—no te 9 o nga ra o Akuhata kua hori ake nei—a ko taua reta i tukua ki nga Whare e rua o te Paremete o Niu Tireni i runga i te whakahau a Te Kawana.

I te mea kaore, i te marama kia maua te huarahi hei whakahaere tonu ano i te mahi i tukua mai ra ki a maua, a kua tata nei te pau nga tau e rua, heoi ano te mea tika he whakahoki atu i ta maua Komihana ki a koe e Te Kawana. Koia tenei maua ka tuku atu.

Erangi i runga i ta maua tuku atu i ta maua Komihana e mea ana maua me tuku atu ki o ringaringa a maua mahinga me kore pea e kitea tetahi pai i roto. E kaha ana to maua whakaaro ki te nui o aua take i tukua mai ra hei whiriwhiringa. A me ta maua mahara tonu ko nga tikanga o roto me whakaoti ano e te Kawanatanga o konei e te Kawanatanga ranei o Ingarangi; a e pai ana maua i runga i te mohio he korero nui rawa nga mea i kohia nei e maua, a e kore rawa pea e taea e tetahi atu Komiti e whakaturia ana e te Paremete o Nui Tireni. Heoi ko tenei e mea ana maua e tumanako ana kihai i kore tikanga ta maua mahi.

No runga i nga take kua korerotia nei e maua, kihai maua e Te Kawana e ahei te tuku atu ki a koe i te tino ripoata o ia mea tika nei i runga i ta maua Komihana, erangi e pa mai ana te mahara ki a maua, ko te mea tika me korero atu ki a koe e Te Kawana i te whakaaro kua hangaia e maua i roto i ta maua mahi, tae mai ki te wa i whakamutua ai.