I.
Mo Nga Kura Ratapu mo Nga Tamariki.

He whakahau tenei ki nga wahi katoa o tenei Atirikonatanga mo nga Kura tamariki i nga Ratapu kia tu tonu.

II.
Kaua nga Whare-Karakia e waiho hei Whare-kura ra noa.

Ki te whakaaro o tenei Hui, ekore e tika kia waiho nga Wharekarakia hei whare-kura i nga ra noa, engari me whakamotuhake mo te Karakia anake; a me whakatu ano nga whare-kura. Ehara tenei tikanga i te pei i nga tamariki i nga kura, erangi he mea kia motu kē te Wharekarakia, kia motu kē te whare-kura.

III.
Mo nga moni haerere a nga Mangai Reimana.

Kia whakaaro nga tangata o nga Pariha ki o ratou Mangai Reimana, ki te whakaea i nga moni e pau ana i a ratou e haerēre ana ki nga Hui. Ko aua moni me tango i roto i nga Kohikohi, me kohi ra waho ranei.

IV.
Mo nga turoro kia Whakaaturia ki te Minita.

He kupu tenei ki nga tangata katoa o ia Pariha, o ia Pariha, mo nga turoro kia whakaaturia mai ki te minita; kia kaua e waiho kia takoto noa iho taea noatia to ratou matenga, ka korerotia ki te minita. He tino mea pouri tenei.

V.
Kia haerere nga Minita ki te tirotiro i nga kura.

Kia tae tonu nga minita ki nga kura tamariki i nga ra noa, ki te whakaako i nga tikanga o te Whakapono.

VI.
Kia whakamutua a te mahi Maori ki runga ki nga tamariki.

Kaua nga tikanga Maori ki runga i nga tamariki kohungahunga i mua i to ratou iriiringa, hei muri ka kawea mai kia iriiria. He tino mahi he tena; me mutu rawa taua tikanga Maori i roto i nga tangata Karaitiana.

VII.
He mahi ma nga Hahiwatena.

Ma nga Hahiwatena o nga kainga e whakaatu ki te Minita ina tae atu, i nga tamariki mo te iriiri.

VIII.
He Rehita Iriiriringa, marenatanga, tanumanga.

Kia tu nga tino Whare-karakia i nga Rehita iriiriringa, marenatanga, tanumanga.

IX.
Nga whenua mo te Hahi.

Kia hohoro te whakamotuhake i nga whenua mo te Hahi, karauna karaati rawa, ka tuku ai ki nga kaitiaki (trustees).

X.
Nga kohikohi o nga Whare-karakia.

Kaua nga kohikohi o nga Whare-karakia e meinga hei hoko kai mo nga Hui o te Hahi, erangi me ra waho he kohikohi mo ena mea.

XI.
Kai Titiro moni.

Ma te Minita me tetahi tangata kē, ehara nei i te Hahiwatena, e titiro nga pukapuka kohikohi, e tatau hoki i nga moni o nga Pariha.

XII.
Tikanga mo te nehu tupapaku.

Kaua te Kaikarakia e pokanoa te nehu i te tupupaku i te mea e tata ana te minita. Kia wakaae ra ano ia, katahi te Kaikarakia ka nehu.

XIII.
Utu mo te Iriiri.

Kaua te minita e tono utu mo te iriiri; erangi ki te hiahia nga matua kia homai noa mai he mea ma te minita, e pai ana kia tangohoia e ia.

XIV.
Nga tikanga e whakatakotoria ana e te Hui.

Kia whakamana rawatia nga tikanga e whakatokotoria ana e te Hui o te Hahi.

XV.
Nga mema noho atu.

Ki te noho atu tetahi mema o te Hui, kia tae rawa ki te Upoko he reta whakaatu i te take i noho atu ai.

XVI.
Nga Tohunga Maori.

Kia whakakorea rawatia to haere ki nga tohunga Maori.

XVII.
Nga pire moni

Kia marama rawa nga pire moni o nga Pariha ka ahei kia tangohia; ki te hē te pire ka whakahokia kia whakatikaia mai.

XVIII.
Rawiri ma nga Kaikarakia.

Me tuku noa te Kawiri ma ngu Kaikarakia tuturu o nga Pariha, ma nga wharekarakia e hoatu.

XIX.
Kaua te Hahi Maori e wehea.

Kia kaua rawa te Hahi Maori e wehea mai i te Hahi Matua, ara i te Hahi o Ingarangi.

XX.
Kia toru tau e tu ai te Reimana.

Kia whakatuturutia nga tau e tu ai te mangai Reimana ka ahei ai kia pooti ano, hei te toru o nga tau

XXI.
Nga toenga o nga moni o nga Pariha.

Kia whakaaro te Hahi Maori ki te whakatakoto i nga moni toenga a nga Pariha hei oranga mo ratou.

XXII.
Kawe Rongopai

Kia kaua e kahore he moni kawe i te Rongo Pai i nga pire moni o nga takiwa, ahakoa nui, iti ranei.

XXIII.
Hahu tupapaku.

Kaua rawa e hahua te tupapaku i tanumia ki nga wahi i whakatapua hei Parikarauna.

XXIV.
Papa me te whaea hei Matuaatua.

He mea tika hei Matuaatua te papa me te whaea, a ma raua e whiriwhiri he tokotoru mo raua.

XXV.
Kohi Kirihimete.

Me kohikohi nga pariha katoa o tenei Atirikonatanga i nga Kirihimete, ahakoa Ratapu, ra noa ranei, hei Tahua mo nga mahi o tenei Atirikonatanga.

XXVI.
Te tikanga mo te korero.

Te ruuri mo te korero a nga mema o te Hui:—Ko te Kaiwhakaari: kia rua tunga ki te korero; ko te Kaitautoko kia rua tunga—ko era atu mema kia taki tahi.

XXVII.
Mahi tohunga kia pehia.

E whakaae ana nga mema katoa o tenei Hui, kia whai kupu, kia pehia nga mahi tohunga Maori e whakararuraru nei i nga Maori.

XXVIII.
Kohikohi mo tk perehitanga i nga Mahi.

Me Kohikohi nga Pariha Katoa i te rima hereni, ia tau, ia tau, hei utu i te perehitanga i nga Mahi o te Hui.

He tohutohu mo nga whenua e tukua ana mo te Hahi.

1.	Me matua ruri.
2.	Ka oti te ruri me tuku ki te Kooti whakawa whenua.
3.	Ra puta i te Kooti, me tuku ki nga Kaitaki (trustees). Kei nga kaituku te tikanga mo nga tangata ma ratou e tiaki, erangi kia uru te Pihopa, te Atirikona ranei ki roto i nga Kaitiaki.page 13
4.	Ma te Pihopa e rapu tetahi wahi u te moni hei utu mo te ruritanga, me te whakawakanga o nga whenua e tukua ana mo te Hahi. Me whakarite ta te Pihopa moni ki to pai, ki te nui ranei o te whenua.

He inoi mo te Hui o te Hahi Maori.

E te Atua Kaha rawa, kua oti te whakakotahi e koe tau hunga whiriwhiri katoa hei tinana mo tau Tama mo to matou Ariki mo Ihu Karaiti; ki te huihui hoki ou tangata ki tetahi wahi i runga i tou ingoa, ko reira ano koe; kia anga mai to whakaaro atawhai ki tenei wahi o te Hahi, manaakitia mai hoki matou, te Pihopa, me nga Minita, me nga Mangai o te iwi kua mine mai nei ki te rapu tikanga. Kia riro mai i a matou nga taonga maha a tou Wairua Tapu, ara, te mahara, te mohio, te kaha, te aroha, me te ata whakaaro; kia whai tonu ai matou i roto i a matou mahi katoa, ko koe kia whakakororiatia, ko te pai o to iwi kia kake, ko tou rangatiratanga kia whakanuia. Kei meatia tetahi mea e matou i runga i te tikanga totohe, i te whakapehapeha, i te mataku ranei i te tangata. Kei hē hoki a matou mahi i te whakaaro poka noa ake, i te hianga ranei a te tangata: engari, kia ata whakatakotoria nga tikanga katoa e tupu pai i to Hahi i roto i a matou; kia mahia ai e matou katoa nga mahi pai kua rite mai nei i a koe hei mahinga ma matou; kia whakakotahitia ai matou katoa i roto i te whakapono, i te aroha; ki rite tahi ai hoki o matou whakaaro, me o matou mangai, te whakakororia i a koe; ko Ihu Karaiti hoki to matou Ariki. Amine.