[
Translation.]
No 180.—Pitihana a
Piripi A Maari me etahi atu toko rima.
E Inoi ana nga kai-pitihana kia uiuia nga mate kua pa ki a ratou mo runga mo te Moana o Wairarapa, a kia hoatu he ora mo ratou.
Koia tenei te ripoata a te Komiti, i te tau 1893, i whiriwhiria ano tenei putake e te Komiti mo nga Mea Maori, a koia tenei ta ratou ripoata i tuku ai ki te whare: "I hanga ano tetahi ripoata e tetahi Roira Komihana i te tau 1890 mo runga i nga take katoa o tenei pitihana, tirohia te Pukapuka II. o te Paremete II., 1891. G.–4. E tino marama ana kua tau tetahi mate ki runga i nga Maori, a heoi nei te take, mehemea ma nga ropu takiwa e whakarite i aua mate ma te Kawanatanga ranei. E whakaaro ana tenei Komiti ma te Kawanatanga e whakarite, notemea na te Kawanatanga i hoko aua whenua ki nga Pakeha, me te whakatakoto i tetahi tikanga i roto i te Ture mo nga Mahi mo te Katoa i ahei ai te ropu Takiwa te keri i te wai keri timata mai i te roto tae atu ki te moana, a na konei i tau ai tetahi mate ki runga i nga take katoa a nga Maori. E tono ana te Komiti kia tere tonu te whakahaere i tetahi tikanga, i runga ranei i te hoko i nga take a nga Maori i runga ranei i te whakarite i tetahi tikanga ki a ratou mo te mate i tau ki a ratou."
Kei te pouri te Komiti i te mea kaore i tirohia te whakahau a te Komiti o te tau 1893, a ko tenei ka tino whakahau te Komiti, i te mea he tino pono kua pa he mate ki nga Maori, na reira ko te mea tika me whakaora taua mate.
A ka apitiria e te Komiti tenei kupu, i te mea kua whakaaturia ki a ratou kei te kimi kereeme te Kawanatanga ma ratou mo te ruritanga o taua moana, ehara nei i nga Maori i whakahau kia ruritia, a kei te mea te Kawanatanga me hoko nga take paanga ki taua moana hei whakaea i taua ruri. Engari kei te tumanako tonu te Komiti e Kore te Kawanatanga e haere i runga i taua tu huarahi.