The Ancient History of the Maori, His Mythology and Traditions: Horo-Uta or Taki-Tumu Migration. [Vol. III]
Upoko IX. — Kui, Tutu-Mai-Ao, Me Turehu. (Nga-Puhi.)
Upoko IX.
Kui, Tutu-Mai-Ao, Me Turehu. (Nga-Puhi.)
Waiho ra ia nei au, e koro ma,
Maku au e haere ki mua o te ara
Whanga (tatari) mai ai. Ka tata ki a koe
Nga taru o Tura, ko te hina
Ko te mate, te whanga iho nei.
Ka poro ra hoki taku akototanga,
Ka taiapo rawa mai, nga karukaru
No Kahu-tau-ranga.
Waiho noa e raro, kia takoto ana
Hei matakitaki mai ki au, e, i, i.
Ko tenei motu ko Ao-tea-roa, he mea hi na Maui, te eanga ki runga he whenua. Koia e kiia nei ko te Ika-a-maui. Waiho atu e Maui te kai tiaki o tana ika ko Kui, ka tupu tena iwi a Nga-ti-kui, hei iwi nui mo runga i te Ika-a-maui. He maha nga tau i noho ai te iwi o Maui i runga i taua ika; tera tetahi iwi kua tere mai i rawahi awa; tona ingoa ko Tutu-mai-ao tae mai ki te Ika-a-maui ka u ki uta timata tonu atu te whawhai patu, me te whawhai tohungatanga, me te moe ano tetahi ki tetahi i nga wahine me nga taane; te mutunga iho o a raua whawhai, ka ngaro atu ko Kui haere ana ki raro ki te whenua noho ai; ka riro te Ika-a-maui i a Tutu-mai-ao, he maha nga tau i riro ai te mana o te Ika-a-maui i a Tutu-mai-ao, tera ano ka maanu mai he ope i rawahi awa ko Turehu tona ingoa; tae mai ka u ki uta ki te page 116 Ika-a-maui, u kau ki uta kua timata te whawhai a Tutu-mai-ao raua ko Turehu, he whawhai patu, he whawhai tohungatanga, me te moe ano nga taane me nga wahine o tetahi ki tetahi, a ka tapu nga uri, ka ngaro a Tutu-mai-ao; ka riro te mana o te Ika-a-maui i a Turehu. Maha noa atu nga tau i noho ai a Turehu, i runga i te Ika-a-maui. Tera ano te ope a nga uri o Maui te haere mai ra ki te rapu haere mai i te ika a to ratou koroua a Maui, ko Maori te ingoa o tenei iwi, a kotahi tekau whakapa-paranga o taua iwi i noho ai i runga i te Ika-a-maui, kua whawhai patu me te whawhai tohungatanga a Turehu raua ko Maori, me te moe o nga taane me nga wahine o tetahi ki tetahi, a ka ngaro a Turehu, ka tupu nga uri o te taha ki te Maori. Ka riro ano te mana o te Ika-a-maui i nga uri a Maori, tae noa ki te whatekau ma ono whakatupuranga o nga Maori i noho ai i runga i te Ika-a-maui. Na whakarongo e nga iwi o te motu; titiro atu, kia Kui, kia Tutu-mai-ao, kia Turehu, kua ngaro atu ona uri; hore ake o tatou toenga hei karangatanga mo ratou i te ao nei. Ko Tutu-mai-ao tona putanga, he Whei-ao i mua; i te tirohanga a te kanohi, e kore nei e roa kua ngaro. Ko Turehu tona putanga he Patu-paiarehe, e haere ana i runga i nga maunga korero ai, ano he mangai tangata, kahore ia, he mangai wairua Turehu, kua ngaro tahi atu aua iwi me a ratou tohungatanga.