[ko te tohutoro i roto i te reo Pākehā]

He Kupu Timatanga.

He korero ano te korero—ko nga korero o mua o te ritenga Maori, ko nga korero hou o naianei o te ritenga Pakeha—inahoki, ko Nga Taonga katoa o te Pakeha, ko nga Rawa, ko te pai, ko te atahua hoki o nga tikanga o roto o te Ture Pakeha, kihai i ngaro te kimi e te tangata Maori;—i kimihia tonutia ai—na te pai kua kitea;—waihoki pea ko tenei pukapuka, ina oti te korero,—no te kitenga pea, ka kite iho ki te pai, ki te atahua o nga korero,—kowai i hua ai, ekore ranei e minamina tonu ki nga Pukapuka pakeha kia whakamaoritia, kia taia ki te Reo Maori:

Ko tenei,—maumau mohio noa te Koroheke, te Ruruhi, te Tamariki ki te tuhituhi, ki te korero pukapuka; inahoki, he ruarua rawa no nga pukapuka kua oti te whakamaori, te whakawhiwhi kia ratou—nokonei i puta ai te whakaro atawhai o te Kawana Nui, o Kawana Kerei, kia whakamaoritia ano he pukapuka, hei whakamohio mai i nga tikanga o te Moni, o te Taonga, o te Mahi, o te aha, o te aha—i nga tikanga kaore nei ano i rangona e te tokomaha o te tangata:—Heoti, kua oti hoki te whakatauki i mua—ka mea—"Ma te minamina ki te korero o te Pukapuka, ma te nui hoki o nga Roro o te tangata hei whakaro i nga kupu, ma konei ka kiia ai, he Mohio, he Tohunga te tangata;—waihoki ko tenei, he Tino Tohunga no Nga Pakeha o Ingarangi nana i tuhi i te matuatanga, whakamaoritia nei hei Pukapuka aroha ki nga tangata o tenei whenua o Nui Tireni.