.jpg)
He Kawakawa. Na Te Hinota O Te Pihopatanga O Waipu.
I.
Mo Te Ahua O Te Hahi I Tenei Wa.
He whakaatu tenei na tenei Hinota i te nui o tona pouri mo te ahua raruraru i etahi wahi o te Hahi i tenei Pihopatanga e mau tonu nei: kei te whakawhetai ano ia ki te Atua mo tana ata tiaki i etahi wahi o tenei Pihopatanga i kore ai e tamia e aua raruraru.
He whakamahara hoki tenei na te Hinota i nga tangata katoa o te Hahi ki te mahi ma ratou; ara, ki te whakaiti i a ratou ki te aroaro o te Atua, me te inoi ki a Ia kia whakatahuritia e Ia nga ngakau tutu o te tangata, kia whakahokia mai hoki e Ia nga wa o te Rangimarie ki tenei wahi o Tana Hahi.
II.
Mo Te Whiriwhiringa I Nga Hinotamana.
| 1. | I te mea kahore ano kia marama noa te maha o nga tangata o ia Pariha o ia Pariha, me waiho ma te Pihopa e whakarite te tokomaha o nga Hinotamana mo te Hinota Pihopatanga, me te tokomaha hoki o nga Hinotamana mo ia Pariha mo ia Pariha. |
| 2. | Ko te wa pai mo te whiriwhiringa i nga Hinotamana o ia Pariha o ia Pariha ko nga ra o Tihema. |
| 3. | Ko nga Kai-whakahoki, ma te Pihopa e karanga; a, ma nga Kai-whakahoki e whakarite he tapiri mo ratou. |
| 4. | Kei te whiriwhiringa o nga Hinotamana, kia marama te ki a te tangata i roto i tana pukapuka whiriwhiri; he tangata ia no te Hahi o Ingarangi o Aearani i Niu Tireni. Ki te huihui he tokomaha nga tangata i roto i te pukapuka kotahi, e pai ana; ki te mea na te tangata kotahi tana pukapuka, e pai ana: kia rite ki te Tauira e piri ake nei. Ko te ki hoki a te Hinota Nui mo te ahua o nga tangata e tau ana kia whiriwhiria hei Hinotamana, me tuhituhi ki runga ki te pukapuka e tukua atu ana e nga Kai-whakahoki ki nga tangata. |
| 5. | Me whakamahara e te Kai-whakahoki nga tangata o tona wahi ki te wa o te whiriwhiringa o nga Hinotamana: ko tana karanga kia puta i nga ra o Noema. |
| 6. | Ka oti te whiriwhiri tetahi tangata e kore ia e tu hei Hinotamana kia taea ra ano te ra tuatahi o Hanuere: Ekore hoki e tu tonu hei Hinotamana i te mea kua pahure te 31 o nga ra o Tihema, o te tau i whakaritea ai ia hei Hinotamana.page 20 |
| 7. | Ka oti te whiriwhiri he Hinotamana mo tetahi Pariha, hei reira tonu ka tuhituhia ai e te Kai-whakahoki he pukapuka whakaatu ki te Pihopa.–Ko te pukapuka whakahoki, ma te Hinotamana ano e kawe ki te Pihopa i tona haerenga ki te Hinota. |
| 8. | Ki te watea te wahi o te Hinotamana o tetahi Pariha i te mate, he mea whakawatea marire ranei nana; ma te Kai-whakahoki e mea kia whiriwhiria e nga tangata o taua Pariha he whakakapi mona. Ko te whakakapi mo taua Hinotamana me whiriwhiri i roto i nga marama e rua, i muri iho i te wateatanga o te nohoanga o te Hinotamana tuatahi. |
| 9. | Ko nga whakahokinga e whakahengia ana, me homai ki te aroaro o te Hinota whakawa ai. |
Tauira mo te pukapuka whiriwhiri.
Pariha o
Tihema 186.
He tangata {ahau matou} no te Hahi o Ingarani o Aearani
i Nui Tireni; a, e mea ana {ahau matou} Ko
hei Hinotamana mo tenei Pariha mo te tau e takoto ake nei.
III.
Mo Te Moni Utu Mo Te Ferehitanga O Nga. Mahi A Te Hinota.
Kia puta te ki ki nga Pariha katoa o tenei Pihopatanga, kia homai nga hereni 15 e ia Pariha. e ia Pariha i roto i tenei tau mo te perehitanga i nga mahi a te Hinota, mo era atu mea hoki o te Hinota. Me hoatu aua moni e nga tangata o te Pariha ki te Minita, a mana e hoatu ki te Komiti Tuuturu o te Hinota.
IV.
Mo Nga Pariha Kahore Ano I Kohikohi Moni Whangai Minita.
He whakahau atu tenei na tenei Hinota ki nga Pariha katoa o tenei Pihopatanga kahore ano kia anga ki te kohikohi i tetahi Tahua Whangai Minita. kia whakaputaia he uaua ki te mahi i tena mahi.
V.
Mo Te Kawe I Te Rongopai.
He whakahau tenei na tenei Hinota ki nga tangata katoa o te Hahi i tenei Pihopatanga, kia kaua e whakarerea te kohikohi moni hei kawe i te Rongo pai ki nga Tauiwi. Engari me momotu e tenei tangata, e tenei tangata tetahi wahi o nga mea i homai e te Atua ki a ia, hei tohu mo tona ngakau whakawhetai mo nga mea i tukua nuitia nei ki a ia.
VI.
Mo Nga Whare Minita.
I te mea kahore ano kia rite he Hahiwatena mo ia Pariha, mo ia Pariha, ma nga tangata ano o te Pariha e whakarite he kai hanga whare mo to ratou Minita; ma ratou hoki e whakaaro he kakahu, he aha noa mo roto i taua whare, kia kore ai he manukanuka mo te Minita i te mea ka haere ia ki te tirotiro i tera wahi, i tera wahi, o tona Pariha.
VII.
Mo Nga Kura Tamariki.
He whakamahara tenei na te Hinota ki nga Minita ki nga Kai-whakaako, kia whakaturia nga Kura ki nga kaainga katoa; a, ka tu nga Kura kia whiriwhiria hoki he tamariki mo te Kura i Turanga. He ki hoki tenei ki te Hinotamana kia uru ano ia ki ta raua mahi.
VIII.
Mo Nga Whare Karakia.
Me akiaki nga tangata o ia kaainga o ia kaainga, kia whakaotia nga wini o nga Whare-karakia papa: kia pania houtia hoki aua whare ki te peita; ko nga whare tukutuku ka pakaru, kia whakahoutia, kia hangaa hoki he Wharekarakia ki nga wahi Whare-karakia kore.
IX.
Mo Nga Monita Kia Haere Ki Te Kura.
Ko nga Kai-whakaako ko nga Monita, o ia wahi, o ia wahi, kia haere ki Turanga ki te Kura, kia kapi ai te wahi o nga Minita kua riro mai nei.
Korero a te Komiti i whiriwhiria hei uiui te ahua o nga Whare-karakia o ia kaainga, o ia kaainga.
| Wharekahika, | he whare tukutuku, e ora ana. |
| Te Kawakawa, | he whare papa, kahore he wini |
| Horoera, | he whare papa, kahore he wini. |
| Rangitu kia, | he whare papa, ka pakaru. |
| Ti, | he whare tukutuku, ka pakaru. |
| Tikitiki, | he papa nga pakitara, kahore he wini. |
| Pukemaire, | he whare papa, kahore he wini. |
| Te Horo, | he whare papa, kahore he wini. |
| Kakariki, | he whare papa, kahore he wini. |
| Te Karaka, | he whare tukutuku, mea ake whakahoutia. |
| Tuparoa, | He Whare Papa, Kahore He Wini. |
| Reporua, | He Whare Tukutuku, Ka Pakaru. |
| Whareponga, | he whare papa, kahore he wini. |
| Popoti, | he whare papa, kei te hanga. |
| Akuaku, | mea ake hanga te whare papa. |
| Waipiro, | he whare papa, kahore he wini. |
| Tuatini, | he whare papa, kei te hanga. |
| Ariuru, | he whare tukutuku, ka pakaru. |
| Taangoiro, | he whare papa, kei te hanga. |
| Anaura, | he whare tukutuku, ka pakaru. |
| Uawa, | he whare papa, kahore he wini. |
| Kaiaua, | kahore. |
| Mangaatuna, | kahore, meake hangaa. |
| Puatai, | he whare papa, kahore he wini. |
| Whangara, | he whare tukutuku e ora ana. |
| Turanganui, | he whare papa pai. |
| Waerengaahika, | he whare tukutuku, ka hinga. |
| Te Karaka, | he whare tukutaku, e ora ana. |
| Whakato, | he whare papa, kei te hanga nga wini. |
| Maraetaha, | he whare tukutuku, kahore he wini. |
| Whareongaonga, | he whare tukutuku, e ora ana. |
| Nukutaurua, | kahore. |
| Nuhaka, | he whare tukutuku, ka pakaru. |
| Te Whakakii, | he whare tawhito, meake ha-nga te mea hou. |
| Waihirere, | he whare papa kei te hanga. |
| Turiroa, | he whare papa pai. |
| Uruhou, | he whare papa pai. |
| Teruahooru, | he whare tukutuku, ka pakaru. |
| Te Tawa, | he whare papa pai. |
| Opouiti, | he whare tukutuku, ka pakaru. |
| Mohaka, | he whare tukutuku, e ora ana. |
| Waikare, | kahore. |
| Putere, | kahore. |
Na te kore Hinotamana o te Atirikonatanga o Tauranga te tika ai te uiui i te ahua o nga Whare-karakia o taua takiwa.
Ma tenei korero a ta koutou Komiti ka kitea ai, ko te maha o nga Whare-karakia kahore i oti nga wini. Tetahi mate hoki ko te kore peita.
Ki te whakaaro o tenei Komiti ko tenei hei kupu whakaari ki te Hinota:—
"Me akiaki nga tangata o ia kaainga, o ia kaainga, kia whakaotia nga wini o nga whare karakia papa; kia pania houtia hoki aua whare ki te peita; ko nga whare tukutuku ka pakaru kia whakahoutia, kia hangaa hoki he Whare-Karakia ki nga Whare-karakia kore."
(Whaitohu.) Matiaha Pahewa.
Upoko.