.jpg)
Waerengaahika.
Manei, Hanuere 5, 1863.
Te mutunga o te Karakia ka huihui te Hinota ki te Whare Kura i Waerengaahika.
Timataia ana te mahi e te Pihopa ki te inoi.
Karangarangatia ana nga ingoa o nga Minita me te whakao ano enei ki o ratou ingoa:
- Archdeacon W. L. Williams,
- Rev. S. M. Spencer,
- Rev. R. Waitoa,
- Rev. E. B. Clarke,
- Rev. R. Kawhia,
- Rev. C. S. Volkner,
- Rev. T. Huata.
Muri iho ka karangarangatia nga ingoa o nga Hinotamana, me te whakao ano enei ki o ratou ingoa:
- W. P. Whitirangi,
- H. P. Pakuru,
- W. H. Paetorori,
- W. P. Wakamatai,
- W. M. Tarapuhi,
- H. Taiki,
- W. T. Te Ngarara,
- H. Te Hoata,
- P. Taia,
- H. Puha,
- E. Waikaaho,
- R. Paipa,
- H. Te Horo,
- R. Wahawaha.
- H. Mokoera,
- H. Te Kani,
- W. Pere,
- A. Matete,
- H. Maataora,
- H. Paihia,
- K. Te Iwirori,
- K. Piwaka,
- H. Te Wainohu.
Katahi ka ki te Pihopa, kua tu te Hinota, a, kakorerotia e ia tana
Korero Timatanga:
E hoa ma,
Ka hui nei tatou i tenei wa, me whakawhetai tatou i te tuatahi ki Te Atua mo ana atawhaitanga i a tatou, i te wa ka hori nei i muri o tera Hinota. He mahi hou ta tatou mahi i tera tau. Huihui tata nei tenei Hahi ki a te Karaiti i roto i te pouri, he mea tupu hou ake ano te Hinota. Ki noa etahi, Tera e tupu? Ko etahi hoki o tatou, i te mea kahore ano kia mohiotia te take o te Hinota, i ngakau-kore ki tenei mea. Ki ana etahi, He aha te pai? Maumau haere noa atu ki tawhiti ki tera whenua mamao. He aha tatou te huihui noa ai i konei i o tatou kaainga? Heoi kei te Karaipiture tenei kupu: "He ora kei nga kai whakatakoto whakaaro toko-maha";—ko tenei hoki: "Ko te rino hei whakakoi mo te rino, me te tangata ano hoki hei whakakoi i te mata o tona hoa." He tikanga tenei na nga iwi katoa, na nga tangata maori ano hoki, ko te runanga i runga i nga mea rahi. Na, ko tehea te mea rahi? Hua atu ko nga mea o te Whakapono, ko te whakatakotoranga i nga ture e pai ai nga tikanga o te Hahi. Ki te mea ka rite ta tatou mahinga i enei mea ki ta tatou e whakaae nei, ara, kia okioki ki ta Te Wairua Tapu, nona nei te kaha kua inoitia e tatou inaianei, tera e oti pai i Te Atua a tatou mahi.
Tokorima nga Minita, tekau ma whitu nga Reimana i to tatou huihuinga i tera tau; otira kahore he tangata i tae mai i etahi o nga kaainga mamao. Inaianei kua puta mai he tangata mo te Hinota i Rotorua, i Tarawera, i te Rotoiti, i Tauranga, i te Awa o te Atua, i Opotiki. Kei tawhiti te whakaaro o nga tangata i haere mai i tera pito o te Pihopatanga, te wehi koutou i te roa o te ara.
Ko te mea nui o nga Hinota ko te whakakotahitanga, kei roto hoki i te kotahitanga te kaha. Ko te tohu tenei o te whakapono Karaitiana, kotahi te tinana, kotahi Te Wairua, kotahi Ariki, kotahi whakapono, kotahi iriiringa, kotahi Te Atua, Te Matua o nga mea katoa. Heoi kei nga mea ririki he maha nga wahi i puta ke ai te ahua o tetahi kaainga o tetahi kaainga. I te mea kua takoto te ture a te Karaipiture kahore he rapunga a te ngakau, otira he maha nga page 6
mea kua waiho ma te Hahi e whakarite ona ture. No te Hahi o Ingarani tatou, a he ture ano a tatou kei roto i te Pukapuka Inoi, kei nga Ture ake ano hoki a te Hahi. He mea tuku iho ano enei ki a tatou, kahore hoki enei e ahatia e te Hinota. Tera atu ano etahi tikanga e meatia mo te aha mo te aha, ko enei ano hei mahi ma te Hinota.
I ta tatou huihuinga i mua i korerotia e au etahi o nga mahi ma te Hinota. Inaianei ka whakamaharatia koutou ki nga Ture II, IV, V, o te Hinota Nui, kua oti nei te whakamaori.
Ko te Ture II mo te whakaturanga o nga Hinota Pihopatanga. Na, e korerotia ana i te rarangi tuatahi, kia kaua tetahi Pariha e hapa i te Hinotamana. Wahiiti ka rite tenei Ture i a tatou. Kahore ano kia wehea te Pihopatanga hei Pariha, otira kua whakaritea nga kotinga o nga rohe, i runga o te rarangi tuarua o taua Ture, a ka tae mai nga Reimana i te nuinga o aua kotinga. Kia oti nga Pariha te wehewehe, ma tenei Hinota e karanga te tokomaha o nga Hinotammana e whiriwhiria e ia Pariha e ia Pariha; me karanga hoki te wa e whiriwhiria ai nga Hinotamana, me nga mea katoa e ata mahia ai, e tika ai, e whai mana ai aua whiriwhiringa.
Kia puta o koutou whakaaro ki te Ture IV mo te motuhanga o nga Pariha. He kotinga motuhake te Pariha. Ka whakatakotoria ona rohe kia pai ai te whakahaere tikanga a nga Apiha ka whiriwhiria nei mo ia mahi, kia ata mahia ai hoki e te Minita e karangatia ana hei minita mo ia wahi.
Kahore nei hoki he Pariha o tenei Pihopatanga, otira meake puaki te kupu a etahi tangata kia motuhia tetahi Pariha i runga o te Ture. Ka puta te whakaaro o nga tangata o tetahi wahi kia motuhia hei Pariha, ma ratou e korero ki ahau, a maku e whakapuaki ki tenei Hinota, na, ka whakaritea ta ratou whakaaro. Katahi ka karangatia nga Apiha mo te Pariha, nga Hahiwatena me nga Wetirimana. Ma te Hinota hoki e whakarite nga mahi me te mana mo aua tangata.
Ko te Ture V o te Hinota Nui mo te whakaritenga i nga Minita mo nga Pariha. He mea nui rawa tenei ki nga tangata o te Hahi. Ka kitea nei hoki he mea pai kia motuhia he minita mo tena wahi mo tena wahi. Kua puta hoki te uaua o etahi wahi o tenei page 7
Pihopatanga ki te kohikohi mo te whangai Minita. I to tatou Hinota tuatahi kua tu nga pauna £747. No Waiapu te nuinga, no te Wairoa hoki tetahi wahi. Nga moni o te kohikohi i roto i tenei tau £408; hui katoa £1155. I kohia ki Tokomaru i te tau nei £175.
Kia taea ra ano te £200 e tetahi Pariha, ko nga hua o taua moni hei whangai mo te Minita, kei te tangata whenua hoki tetahi wahi mana i ia tau i ia tau, katahi ka tika te karanga a taua Pariha ki tetahi Minita tuuturu kia whakanohoia mo reira.
I te mea ka watea tetahi Pariha me rapu he Minita, me whakahua tona ingoa ki te Pihopa kia whakanohoia ki taua Pariha e etahi Kai-whakahua; ko enei hoki me momotu i ia tau i ia tau, etahi e te Hinota Pihopatanga, etahi e te Wetiri o te Pariha. Me penei hoki me whakatu nga Kai-whakahua, katahi ka motuhia he Minita ki tetahi Pariha. Ki te mea ka whakatutukiria tenei Ture inaianei, ka takoto te huarahi mo ko atu.
Tenei ano tetahi mea ka whakaaturia ki tenei Hinota, he moni homai noa na te pakeha hei whangai Minita maori. Ewha nga homaitanga o aua moni, a hui katoa kotahi rau pauna. I homai tenei moni e F. H Piesse, Esq., no Hopataone. Koia nei te kaituhituhi a tetahi Huihuinga tamariki o taua kaainga, hei whakatuputupu i te mahi kauwhau ki nga tauiwi. Ko te nuinga o aua moni na nga tamariki o te Kura Ratapu. Ekore e huihuia tenei moni ki roto ki nga kohikohi a nga tangata, engari ka whakapaua hei moni whangai mo nga Minita o nga wahi, kahore nei i kapi te kohikohi, kahore nei hoki i whai mea ma o ratou Minita.
Kua oti te pukapuka mo te kaainga o te kura i Waerengaahika. Ka pumau nei ano nga kai-tiaki i whiwhiria e nga tangata nona te kaainga. Na, ka takoto nei taua pnkapuka.
Kei te ata tupu nga mea i nohoia ai tenei kaainga. Kei te iwa tekau nga tangata me nga tamariki e whakaakona nei ki tenei kura. Tokorua nga Minita kua puta atu i konei, ka noho nei hoki ki runga o te mahi. Tera atu hoki etahi mo amuri nei. Kei te tupu ano hoki te kura ki Tauranga. He uaua raia te mahi, he mahi hou hoki. Heoi ko te hunga o taua Kura kei te wha tekau ma rima.
I to tatou Hinota i mua i pute he kupu mo te kawenga atu i page 8
te Rongo Pai ki nga iwi e noho ana i te pouri. Tenei tetahi mahi pai a te Hinota Nui, i te runanga o muri nei; kua huihuia te Pihopatanga o Meranihia ki roto ki te Hinota Nui; na ka piri rawa nei aua motu o Meranihia ki a tatou inaianei. Kotahi rau o aua motu e haerengia nei e Pihopa Patihana; nga tangata o aua motu he iwi tangata ke etahi i etahi; rere ke ana hoki nga reo. Ka mauria mai he taitamariki i aua motu ki te kura i Kohimarama i Akarana, ka noho ano i te wa o te raumati, hei te ngahuru ano ka hoki. Ko te take, he ako i a ratou hei kai-whakaako mo o ratou iwi. Erima tekau ma tahi nga tangata i utaia mai e Pihopa Patihana i tenei raumati; erua tekau ma rima hoki nga reo o aua tangata. Na, tenei he putanga mo te atawhai a te Hahi o nga tangata maori; ka tata mai nei ki to tatou aroaro; e taea ano hoki e tatou te matakitaki i te kura o aua tangata.
Ka oti nei hoki te whakaatu e au etahi o nga mea hei korero ma koutou, ma tena tangata ma tena tangata o tenei Hinota e korero mai ana mea e kite ai ia hei mea rahi.
Ma Te Atua e tuku mai tona Wairua Tapu hei whakatotika i a tatou korero. Katahi ka pumau tana mahi i roto i a tatou; a ka hoki ano koutou ki o koutou kaainga, tera koutou e whakaae he pai ma tatou tenei huihuinga."
I whakaaria e Rev. S. M. Spencer, i tautokona e W. P. Whitirangi;
"E whakapai ana te Hinota ki enei korero a te Pihopa, a, he ki tenei ki a ia kia whakaaetia e ia kia perehitia."
Whakaaetia ana.
I whakaaria a Rev. E. B. Clarke, i tautokona e A. Matete;
"Kia whakaturia a Archdeacon W. L. Williams raua ko W. P. Whitirangi hei Kai-tuhituhi mo nga mahi a tenei whaka-minenga o te Hinota."
Whakaaetia ana.
Ka oti te whakatarewa nga "Tikanga mo te Mahi", ka whakaaria e Rev. R. Waitoa, ka tautokona e W. Pere;
"He nui te whakapai a tenei Hinota ki te tukunga mai o nga moni £100 e F. H. Piesse, Esq., ratou ko nga tamariki o tana kura, hei whakaranea i nga moni whangai minita o tenei Pihopatanga: page 9
he ki hoki tenei kia tuhituhia atu ki a ia he pukapuka whakapai e nga Kai-tuhituhi o te Hinota."
Whakaaetia ana.
Whakapuakina ana etahi Korero whakaari, a, ka nukuhia te Hinota e te Pihopa ki te Turei, Hanuere 6, 1863.
Turei, Hanuere 6.
Nga tangata i tae ki te Hinota ko nga tangata ano o te Manei.
Ka mutu te Inoi ka korerotia, ka whakatuuturutia nga korero o tera huihuinga.
Muri iho ka whakaaturia e te Pihopa ki te Hinota he moni na Ngatikahungunu mo ta ratou Tahua whangai Minita, £100, kia apititia ki nga moni i korerotia e ia i roto i tana Korero Timatanga.
I whakaaria e Rev. C. S. Volkner, i tautokona e Rev. Rota Waitoa;
"Kia whiriwhiria he Komiti hei tirotiro i nga raruraru i uaua ai te huihui o nga Minita me nga Reimana o nga kaainga tawhiti ki te Hinota. Nga tangata mo taua Komiti, ko Rev. E. B. Clarke, ko Rev. R. Kawhia, ko H. Te Horo, ko H. Te Wainohu, ko H. Te Hoata, ko te Kai-whakaari."
Whakaaetia ana.
I whakaaria e Rev. E. B. Clarke, i tautokona e H. P. Te Pakuru;
"Kia whiriwhiria he Komiti, hei hurihuri i te tikanga kohikohi i tetahi tahua Moni mo nga mea o te Hinota o tenei Pihopatanga. Nga tangata mo tenei Komiti, ko te Pihopa, ko Archdeacon W. L. Williams, ko Rev. S. M. Spencer, ko Rev. R. Kawhia, ko W. P. Whitirangi, ko H. P. Te Pakuru, ko A. Matete, ko te Kaiwhakaari."
Whakaaetia ana.
I whakaaria e Archdeacon W. L. Williams, i tautokona e Kerehona Piwaka;
"Kia whiriwhiria tetahi Komiti hei hurihuri i tetahi Ture mo te whiriwhiringa i nga Kai-whakahua, mo te whakahuatanga i nga Minita mo nga Pariha. Nga tangata mo tenei Komiti, ko te Pihopa, ko Rev. Te Huata, ko Rev. S. M. Spencer, ko H. Wainohu, ko H. P. Te Pakuru, ko H. Te Horo, ko H. Te Kani, ko te Kai-whakaari."
Whakaaetia ana.
page 10
I whakaaria e Rev. E. B. Clarke, i tautokona e W. T. Te Ngarara;
"Kia whiriwhiria he Komiti hei hurihuri i tetahi Ture mo te whakatakoto i nga mahi ma nga Hahiwatena, ma nga Wetirimana. Nga tangata mo tenei Komiti, ko Archdeacon W. L. Williams, ko Rev. R. Waitoa, ko W. P. Whitirangi, ko W. T. Te Ngarara, ko H. Mokoera, ko te Kai-whakaari."
Whakaaetia ana.
I whakaaria e Archdeacon W. L. Williams, i tautokona e Hare Paihia;
"Kia whiriwhiria tetahi Komiti hei tirotiro i nga tikanga mo te whiriwhiringa i nga Hinotamana; mo te roa o te wa e mana ai te whiriwhiringa, mo era atu mea hoki e tika ai, e pai ai taua mahi. Nga tangata mo tenei Komiti, ko Rev. C. S. Volkner, ko Rev. R. Kawhia, ko Karauria Te Iwirori, ko W. M. Tarapuhi, ko K. Piwaka, ko te Kai-whakaari."
Whakaaetia ana.
I whakaaria e W. P. Whitirangi, i tautokona e Hoera Puha;
"Kia uru a Rev. C. S. Volkner, ki te Komiti i whiriwhiria hei hurihuri i te Ture whakatakoto i nga mahi ma nga Hahiwatena, ma nga Wetirimana."
Whakaaetia ana.
Whakatarewatia ana nga tikanga mo te mahi kia panuitia ai e Rev. C. S. Volkner te korero a te Komiti i whiriwhiria hei tirotiro i nga raruraru i uaua ai te huihui o nga Minita o nga Reimana o nga kaainga tawhiti ki te Hinota.
Panuitia ana nga korero a te Komiti.
I whakaaria e H. Taiki, i tautokona e W. P. Wakamatai;
"Kia Whakaaetia e te Hinota nga ki a te Komiti i whiriwhiria 'hei tirotiro i nga raruraru i uaua ai te huihui o nga Minita o nga Reimana o nga kaainga tawhiti ki te Hinota.'"
Tohetohea ana i konei.
Whakaaria ana e Archdeacon W. L. Williams, tautokona ana e Rev. R. Kawhia, ko tenei kupu whakatika;
"Kia kapea atu i roto i nga korero a te Komiti tenei wahi:—'Me tuhituhi tetahi pukapuka e te Pihopa ratou ko te Komiti Tuuturu ki ia kaainga, ki ia kaainga, hei whakamohio ki nga mahi, me nga painga o te Hinota me te wa, me te wahi ano hoki e mine ai te Hinota.'"
Makaa ana ko te kupu whakatika, wehea ana hoki te Hinota:
| Minita. Ae.—3. | Kahore.—4. |
| Reimana. Ae.—5. | Kahore.—18. |
Makaa ana ko te kupu i whakaaria i mua, whakaaetia ana.
Whakapuakina tetahi korero whakaari, a ka nukuhia te Hinota ki te Wenerei, Hanuere 7.
Wenerei, Hanuere 7, 1863.
Nga tangata i tae ki te Hinota k[gap — reason: illegible] aua tangata ano o era rangi e rua.
Timataia ana e te Pihopa ki te Inoi.
I panuitia, i whakatuuturutia nga korero o tera huihuinga.
I mauria ake i panuitia te korero a te Komiti i whiriwhiria hei hurihuri i tetahi Ture mo te whiriwhiringa i nga Kai whakahua, mo te whakahuatanga hoki i nga Minita mo nga Pariha.
I whakaaria e Archdeacon W. L. Williams, i tautokona e Rev. E. B. Clarke;
"Ko te Ture i hurihurihia nei e te Komiti kia panuitia."
Whakaaetia ana, panuitia ana hoki te Ture, ko te panuitanga tuatahi.
I whakaaria e Archdeacon W. L. Williams, i tautokona e Rev. E. B. Clarke;
"Kia komiti te Hinota kia hurihurihia ai te Ture i panuitia nei."
Whakaaetia ana, komiti ana te Hinota. Tohetohea ana te rarangi tuatahi; a muri iho ka whakaaetia katoatia taua Ture, rite tonu ki ta te Komiti whiriwhiri i whakatakoto ai.
I whakaaturia ki te Hinota te mahi a te Komiti.
I whakaaria e Rev. T. Huata, i tautokona e Rev. R. Kawhia;
"Kia whiriwhiria he Komiti hei tirotiro i tetahi kupu i whakaaetia i roto i tera Hinota, ara, 'E mea ana tenei Hinota, ko nga tangata o nga tini kaainga kia whai whakaaro ki o ratou kai-whakaako, kia whakatuuturutia hoki te Paraire hei ra mahinga ma nga tangata ki o ratou kai-whakaako.' Nga tangata mo tenei Komiti ko Archdeacon W. L. Williams, ko Rev. S. M. Spencer, ko Rapata Wahawaha, ko H. Paihia, ko R. Paipa, ko M. Tarapuhi, ko H. Puha, ko H. Te Kani, ko te Kai-whakaari.
Whakaaetia ana.
Ka oti te whakatarewa nga tikanga mo te mahi, ka mauria ake e Rev. E. B. Clarke, ka panuitia te korero a te Komiti i whiriwhiria hei hurihuri i te tikanga kohikohi i tetahi Tahua moni mo nga mea o te Hinota Pihopatanga.
page 12
I whakaaria e Archdeacon W. L. Williams, i tautokona e W. P. Whitirangi;
"Kia whakaaetia nga ki a tenei Komiti."
Whakaputaia ketia ana te noho o etahi kupu, muri iho ka whakaaetia.
I runga i te ki a taua Komiti ka karangatia e te Pihopa ko Mei he marama kohikohi moni mo taua Tahua.
I panuitia e te Pihopa ki te Hinota tetahi pukapuka a nga tangata o Tuatini, o te Pakirikiri, o te Ariuru, o Tangoiro, [gap — reason: illegible]o Marahea, o Anaura, e mea ana kia motuhia ratou hei Pariha i runga i te Ture IV o te Hinota Nui.
I makaa hoki e te Pihopa ki te Hinota, ma te Hinota e whakarite te wa, me te kaainga e huihui ai te Hinota i tenei tau e haere ake nei, a ka whakaritea ko Tauranga te kaainga, ko Maehe hoki te marama.
Nukuhia ana te Hinota ki te Taitei, Hanuere 8.
Taitei, Hanuere 8, 1863.
Timataia ana e te Pihopa ki te Inoi.
Muri iho ka panuitia, ka whakatuuturutia nga korero o tera huihuinga.
Ka mauria ake, ka panuitia e Archdeacon W. L. Williams te korero a te Komiti i whiriwhiria hei tirotiro i nga tikanga mo te whiriwhiringa i nga Hinotamana.
I whakaaria e Rev. E. B. Clarke, i tautokona e A. Matete;
"Kia whiriwhiria he Komiti hei hurihuri i tetahi Ture whakatu i te Komiti Tuuturu mo tenei Hinota, hei whakatakoto hoki i nga mahi ma taua Komiti Tuuturu. Nga tangata mo taua Komiti, ko Archdeacon W. L. Williams, ko Rev. R. Waitoa, ko Rev. C. S. Volkner, ko W. P. Whitirangi, ko Ep. Waikaaho, ko R. Wahawaha, ko te Kai-whakaari."
Whakaaetia ana.
I whakaaria e Rev. S. M. Spencer, i tautokona i Rev. C. S. Volkner;
"Kia whiriwhiria he Komiti hei tirotiro i te ahua o nga Tahua Whangai Minita o ia wahi o ia wahi, kia whakaaturia ai ki te Hinota. Nga tangata mo tenei Komiti ko te Pihopa, ko W. Pere, ko W. H. Paetorori, ko H. Mokoera, ko P. Taia, ko H. Maataora, ko te Kai-whakaari."
Whakaaetia ana.
page 13
I whakaaria e Archdeacon W. L. Williams, i tautokona e H. Te Kani;
"Kia whiriwhiria he Komiti hei tirotiro i te ahua o te pukapuka mai o Tokomaru kia motuhia taua wahi hei Pariha; kia kitea ai, e rite ana ranei ki nga tikanga a te Hinota Nui, me ki atu ranei e tenei Hinota etahi mea kia rite mai i a ratou. Nga tangata mo tenei Komiti, ko te Pihopa, ko Rev. R. Kawhia, ko H. Te Wainohu, ko H. Te Kani, ko R. Wahawaha, ko H. Puha, ko te Kai-whakaari."
Whakaaetia ana.
I panuitia te Ture mo nga Kai-whakahua, ko te panuitanga tuatoru, a whakatuuturutia ana.
I whakaaria e Archdeacon W. L. Williams, i tautokona e Rev. E. B. Clarke;
"Kia whakatarewatia nga tikanga mo te mahi, kia komiti ai te Hinota ki te hurihuri i nga ki a te Komiti i whiriwhiria hei tirotiro i nga tikanga mo te whiriwhiringa i nga Hinotamana, kia whakaaetia ai aua ki hei Tuuturu ma te Hinota."
Whakaaetia ana. Komiti ana te Hinota. Apititia ana etahi kupu ki te 7, ki te 8 o aua ki, a, ka whakaaetia katoatia.
Whakahokia ana ko te Hinota, a ka panuitia ki te Hinota te mahinga a te Komiti.
I whakaaria e Archdeacon W. L. Williams, i tautokona e W. M. Tarapuhi;
"Kia waiho nga ki i panuitia nei hei Tuuturu ma te Hinota."
Whakaaetia ana.
Nukuhia ana te Hinota ki te Parairei, Hanuere 9.
Parairei, Hanuere 9, 1863.
Timataia ana e te Pihopa ki te Inoi.
I panuitia i whakatuuturutia nga korero o tera huihuinga.
I mauria ake, i panuitia e te Pihopa te korero a te Komiti i whiriwhiria hei tirotiro i te ahua o nga Tahua Whangai Minita.
I whakaaria e Rev. T. Huata, i tautokona e A. Matete;
Whakaaetia ana taua korero e te Hinota.
"Kia whakatarewatia te 14 o nga Tikanga mo te mahi, kia hurihurihia ai ano nga korero a te Komiti i whiriwhiria hei hurihuri i te tikanga kohikohi i tetahi Tahua moni mo nga mea o te Hinota o tenei Pihopatanga."
Whakaaetia ana.
page 14
I whakaaria', e Rev. E. B. Clarke, i tautokona e Archdeacon W. L. Williams;
"Kia whakakahoretia e tenei Hinota nga ki a te Komiti i whiriwhiria hei hurihuri i te tikanga kohikohi i tetahi Tahua moni mo nga mea e te Hinota o tenei Pihopatanga."
Whakaaetia ana.
Ka oti te whakatarewa te 8 o nga Tikanga mo te mahi ka mauria ake ka panuitia e Rev. E. B. Clarke nga korero a te Komiti i whiriwhiria hei hurihuri i tetahi Ture whakatakoto i nga mahi ma nga Hahiwatena, ma nga Wetirimana.
I mauria ake i panuitia e Rev. E. B. Clarke te korero a te Komiti i whiriwhiria hei hurihuri i tetahi Ture whakatu i tetahi Komiti Tuuturu mo tenei Hinota.
Panuitia ana te Ture mo nga mahi a nga Hahiwatena, a nga Wetirimana, ko te panuitanga tuatahi.
Panuitia ana te Ture mo te whakaturanga i te Komiti Tuuturu, ko te panuitanga tuatahi.
I whakaaria e Archdeacon W. L. Williams, i tautokona e Rev. E. B. Clarke;
"Kia komiti te Hinota ki te hurihuri i nga kupu o te Ture mo nga mahi ma nga Hahiwatena, ma nga Wetirimana."
Wkakaaetia ana. Komiti ana te Hinota. Panuitia ana ki te Hinota te korero a te Komiti e te Hinota katoa.
I whakaaria e Archdeacon W. L. Williams, i tautokona e Rev. C. S. Volkner;
"Kia whakaaetia te korero a te Komiti, kia puta hoki taua Ture."
Wkakaaetia ana.
I whakaaria e Archdeacon W. L. Williams, i tautokona e Ep. Waikaako;
"Kia komiti te Hinota ki te hurihuri i te Ture mo te Komiti Tuuturu."
Whakaaetia ana. Komiti ana te Hinota. Whakahokia ana ko te Hinota, a ka panuitia ki te Hinota taua Ture, me nga wahi i whakaputaia keia.
I whakaaria e Archdeacon W. L. Williams, i tautokona e Rev. E. B. Clarke;
"Kia whakaaetia e te Hinota te korero a te Komiti, kia puta hoki taua ture."
Whakaaetia ana.
page 15
Whakatarewatia ana nga Tikanga mo te mahi, a ka whakaari e A. Matene, ka tautokona e H. Puha;
"E mihi ana tenei Hinota ki te atawhai o te Komiti tono Mihanere o te Hahi o Ingarani mo te £450 e korerotia nei e te Pihopa i homai e taua Komiti mo te whangai Minita o tenei Pihopatanga; e mea ana hoki tenei Hinota kia tuhituhia e te Pihopa he pukapuka whakapai ki taua Komiti."
Whakaaetia ana.
I mauria ake i panuitia e te Pihopa te korero a te Komiti i whiriwhiria hei tirotiro i te ahua o te pukapuka o Tokomaru mo taua wahi kia motuhia hei Pariha. Whakaaetia ana e te Hinota.
I whakaaria e Rev. E. B. Clarke, i tautokona e Rev. S. M. Spencer;
"Kia motuhia a Tokomaru hei Pariha, ko nga rohe hok mo taua Pariha kei Anaura, puta noa atu ki Waimahuru."
Whakaaetia ana.
I mauria ake i panuitia e Rev. T. Huata te korero a te Komiti i whiriwhiria hei tirotiro i te kupu a tera Hinota mo te mahi a nga tangata ki o ratou Kai-whakaako.
I whakaaria e Rev. T. Huata, i tautokona e H. Te Kani;
"Kia whai whakaaro nga tangata o nga tini kaainga ki o ratou Kai-whakaako; kia whakatuuturutia hoki te Parairei hei ra mahinga ma ratou i nga mahi a o ratou Minita, a o ratou Kai-whakaako, me te kohikohi ano i etahi mea ma ratou, kia watea ai te Minita, me te Kai-whakaako ki te mahi i ta raua ake mahi."
Whakaaetia ana.
I whakaaria e Archdeacon W. L. Williams, i tautokona e W. T. Te Ngarara;
"Kia panuitia te Ture mo nga mahi a nga Hahiwatena, a nga Wetirimana ko te panuitanga tuatoru."
Whakaaetia ana, kua panuitia kua takoto hoki taua Ture.
I whakaaria e Rev. E. B. Clarke, i tautokona e W. P. Whitirangi;
"Kia panuitia te Ture mo te whakaturanga i te Komiti Tuuturu, ko te panuitanga tuatoru."
Whakaaetia ana. Kua panuitia, kua takoto hoki taua Ture."
I korerotia e te Pihopa te korero o nga mahi a te Komiti Tuuturu o te Hinota mo tenei tau kua pahemo nei; me te pukapuka o nga moni i kohikohia i roto i tenei Pihopatanga mo te tuku atu i te Rongo Pai ki nga tauiwi.
page 16
I whakaaria e Rev. S. M. Spencer, i tautokona e Karauria Te Iwirori;
"He mahi tenei ma nga Minita ma nga Reimana o tenei Hinota, me ka hoki ki o ratou kaainga, te akiaki i[gap — reason: illegible] nga tangata katoa o te Hahi kia uaua ki te kohikohi moni hei kawe i te Rongo Pai ki nga tauiwi, kia penei hoki he mihi ki te aroha nui whakaharahara o te Atua ki a tatou."
Whakaaetia ana.
Korerotia ana e te Pihopa etahi kupu poroporoaki a ka whakamutua e ia te mahi a te Hinota ki te Inoi whakapainga.
Muri iho ka panuitia ka whakaaetia nga korero o to tenei ra huihuinga.