Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga kōrero a Reweti Kohere Mā

Te Tohutohu a Te Matorohanga

Te Tohutohu a Te Matorohanga

Kaua te Ware e Tū i runga i te Marae

Kaua e waiho ma te ware e tū te marae kōrero, te papa taua, te aroaro ope tuarangi, koi uia ka ngaro i a ia, ka hē. Mo te tū, koi tae ki roto i te mura o te ahi, ka kōmutu tangata ware i a ia ka mutua koe ki runga i te mura o te ahi, koi tū ki te kōrero, he tohungatanga ware, ka hapa nga kupu, ka tau te whakahāwea ki runga i te iwi, i te hapū rānei. Waiho tonu i nga uri tuku o te matapihi he tangata kawe i te iwi ki te marae tangata, kia whai manawa ai te kupu Mana Whakaora.

Moihi Te Matorohanga

He whakamārama tuatahi: Moihi Te Matorohanga. No Ngāti-Kahungunu ki Wairarapa. Ko tētahi o nga tohunga, o nga pūkōrero, rongonui o te iwi Maori. Na Te Matorohanga i kōrero ki a Te Whatahoro, ā, na Te Whatahoro i tuhituhi nga kōrero o nehera, i huaina nei ko te Kauwae-runga, ko te Kauwae-raro, ā kua tāia ki te pukapuka. Na Nepia Pohuhu, he pūkōrero anō no Wairarapa, nana te kōrero ko rāua ko Te Matorohanga ētahi o te ope o Ngāti-Kahungunu i haere ki Toka-a-Kuku ki te ngaki i te mate o Pakura -hoia, i runga i te kupu a Te Kani a Takirau i te tau 1836. Ko Pakura te pāpā o Kakatarau rāua ko Mokena Kohere. Na Whatahoro anō te kōrero i tae a Te Matorohanga ki Te Rawheoro, Uawa, te Whare wānanga a te Rangiuia. Rewiti T Kohere

He whakamārama tuarua: Ko te ingoa ake o ēnei kōrero i Te Toa Takitini nama 29, Hanuere 1924. Whārangi 15, ko 'Hei Tū i te Marae kōrero.' —Nga Etita