Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga kōrero a Reweti Kohere Mā

Tukuna nga Taitama ki Te Aute

Tukuna nga Taitama ki Te Aute

E Hoa, Tēnā koe,

Hei whakahōhā noa pea tāku i a koe mo nga kupu kore tikanga e whai ake nei, otirā ko tētahi tangata pea he mea he kupu korekiko, kore tikanga hoki engari, ko te kaituhi e mahara ana he kiko anō kai roto hei whakaatu i nga kino, i nga pai.

Tuatahi, kei te tautoko ahau i te kupu e whakaarotia nei kia 10 pauna mo te tamaiti kotahi i te tau, arā mo nga tamariki e tukua mai ki Te Aute, ki Hukarere kura ai. E hoa ma i ērā atu kāinga, he wāhine he tāne koutou, he matua he whāea aroha nui ki to tamaiti ki o tamariki. Kauaka hei mea kua kore o moni, kauaka hoki hei kii he nui rawa te 10 pounds nei i te tau. Mehemea ka pēnei o kōrua mahara he nui rawa te 10 pounds, kua kore a kōrua moni; ka kii au, nui kē atu to kōrua aroha ki te paipa, ki te tikareti ki te reihi hoiho, me te waipiro hoki pea i te mahara iho ki ta kōrua tamaiti. Kai te mōhio tātau tahi he minamina noa i puhapuha ai i te pawa o te tikareti me te tupeka, engari me whakaaro iho tātou ki te mamaetanga o tātau ngākau, o tātau tinana me o tātau kanohi i te mataaratanga i te pō ki te tiaki i a tātau tamariki. No reira e whae mā, ko tētahi 10 pounds mo to paipa me to tupeka, me to tikareti, ko tētahi 10 pounds mo to tamaiti i te tau ki Te Aute kura ai, whakaaro ki tou mamaetanga i to whakatakanga i to tamaiti. Me mātakitaki tātau ki Te Pīpīwharauroa nama 118, kai te whārangi tuawaru, te whakaatu a nga kaitiaki o te kura a Te Aute. Kāti nga kupu mo tēnā.

Na Eruera Te Kahu

Te Pīpīwharauroa, 1908.

page 193

He whakamārama tuatahi: I ēnei rā 1946, ko te hiahia o te Kāwanatanga kia haere nga tamariki Maori ki nga kura Pākehā. Kua puta te kupu a te Pākehā no nga tamariki kaumātua o Te Aute te Reo Ingarihi pai atu i to te Pākehā. Nga pai o Te Aute he whakaako i nga tamariki ki te whakapono, ki te mahi. Ko te tīmatanga o te mātauranga ko te wehi ki a Ihowa. Reweti T Kohere

He whakamārama tuarua: I kapea mai nga kōrero nei e Reweti Kohere i te wāhanga tuatahi o nga kōrero a Eruera Te Kahu. Ko tōna ake ingoa i roto o Te Pīpīwharauroa nama 120, Maehe 1908. Whārangi 8, ko 'Te Aute me nga Whenua o Whanganui'.—Nga Etita