Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga kōrero a Reweti Kohere Mā

Poroporoaki ki a Mohi Te Atahikoia

Poroporoaki ki a Mohi Te Atahikoia

Haere atu e Mohi[141], haere i te Hāhātanga o Pipiri. E pai ana, e maru ana, e tatanga ana, te whakaarotanga ake mōu kua ngaro atu nei i tēnei ao. Kaore, ana kei te ao nei a Pita[142] rātou ko ana teina hei ranga i a koe ki nga marae maha i haerengia e koe i a koe e ora ana. Haere, e Pā, haere. E kore e ngaro te wawau o to reo i waenganui i a Waikato me Maniapoto me Tuwharetoa, me te Wainui a Rua[143] me Ngarauru me Ngāti Ruanui Taranaki, Te Atiawa, Ngāti Mutunga, Ngaitama, huri mai ki te tonga ki a Ngāti Awa, Ngāti Toa, Ngāti Raukawa, e tomo ki Rangiātea[144], ki te Aputa, ki Wairau, kia Tūrongo me te Rangimarie, o koutou whare karakia i te houkuratanga o te tangata.

E huri ki o iwi i rāwāhi o Ahuriri, Mohaka, Kahungunu ki te Wairoa, Tamaterangi, Ngāti Kōhatu, Te Kōpua Matotoru, Hinepua, Ngai Te Ipu, Ngāti Hine, Rakaipāka, Rongomaiwāhine, Ngai tāmanuhiri, Rongowhakaata, Te Kura a Mahaki, Ngāti Konohi, Te Aitanga a Hauiti, te Whānau a Ruataupare, Ngāti Porou huri noa ki te Whānau a Tūwhakairiora, Te Whānau a Apanui, Ngai Tai, Te page 120 Whakatohea, Tūhoe katoa. Ka whiti koe i tōna waka ōu, e uta ki to waka ki a Te Arawa, e hoe ki Ngai te Rangi, hoe tonu ki Moehau, e huri ki nga ngaru o Tikapa(4), ma Ngāti Pāoa ma Ngāti Maru, ma Ngāti Tama te Rā koe e pōwhiri mai. E ahu ki a Ngāti Whātua, ka haumiri atu ai koe i Kakeao, ka tae ai koe ki Te Puke i Haumu, heia rā te rimu rapa ki a koe, tawhiua ki maui, ki matau, ka whakaango ai i a koe ki te wā ngaromanga, e Koro e!

Haere atu rā, haere atu rā! Haere e Mohi, i te rā e whiti ana! Haere rā e te whakamarumaru o Uenuku[145] e! kei ao ko te rā e, kia taratara atu e koe, taratara tū kei hau ai te moenga roa, kia pā i te ua i te rua e, kei tae kei hoki ake to koiwi ora ki te ao na i!

Haere ki a Te Piwa rāua ko Te Heuheu.

Nga pani, nga tamariki, tēnā koutou katoa. Nui atu te aroha, nui atu, nui atu.

Na Te Taite Te Tomo, M.P.[146]

He whakamārama: Me tango mai ēnei kōrero i te roanga ake o nga kōrero a Te Taite Te Tomo i Te Toa Takitini nama 84, Akuhata 1928. Whārangi 827. Kei te mau tonu nga kōrero ki ta Te Taite Te Tomo i tuhi rā. Nga Etita

[141]Mohi Te Atahikoia: He rangatira no roto o Heretaunga. I mōhiotia ia e nga iwi katoa. I whakataetae ia mo te tūranga mema mo te Tairāwhiti.

[142]Pita: Ko Pita o te Ao Wairua e whanga ana mai ki te hunga ahu atu ki reira.

[143]Wainui a Rua: He ingoa tēnei mo Whanganui.

[144]Rangiatea: Ko te Whare Karakia nui i Otaki. I takea mai tēnei ingoa i Hawaiki. Ko te tikanga tēnei o Io o te tino Atua.

[145]Uenuku: He tipuna no Hawaiki.; ko tōna whakamarumaru he poroporo.

[146]Taite Te Tomo: I mōhio nga iwi katoa ki a Taite, i rongo hoki ki tōna reo, i kata ki ana kōrero nukurau. Ko ia te mema o Te Tairāwhiti mo tōna iwi.