page 6

HE KUPU MIHI

Tihei Mauri ora! ki te whai ao, ki te ao mārama.

Ko tēnei te tauparapara e tika ana mo ēnei taonga na Reweti Kohere i kohikohi i runga i te whakahau i a ia i nga tau ki muri. Kua roa kē ēnei tuhituhinga e takoto ana, ā, kātahi anō ka puta kia whitia e te rā. Ka auē te tauparapara nei, ka tangi atu hoki ki nga mātua tīpuna na rātou nei ēnei kōrero i waiho iho hei waiū ma nga uri whakatipu.

Engari ia, mēna kāre Te Hunga Taunaki Kaituhi Maori o te Queen Elizabeth II Arts Council of New Zealand i āro ake, ka kore pea e kitea e te whatu ēnei tuhituhinga a o tātou mātua. Na taua rōpu i āwhina te tānga i raro i te kaupapa a Te Whakaipurangi Toi. No reira me mihi nui atu rā ki a koutou katoa o runga o tēnei kāhui tirotiro i nga āhuatanga o nga taonga a o tātou tīpuna. Kia piki te ora kia tau nga manaakitanga a te Matua nui i te rangi ki runga ki a koutou katoa.

Me mihi atu hoki ki te Whare Wānanga o Wikitoria mo ta rātou mahi ki te tā i ēnei kōrero ki roto i tēnei pukapuka kia whiwhi ai te motu me nga uri katoa o Aotearoa, kia kitea ai te ātaahua o te takoto o te reo Maori tūturu a nga tīpuna.

Ki a koe anō e Te Puna Mātauranga, me takoto ētahi kupu ruarua mo nga āwhina i kitea i roto i ōu kōkoru. Whakahirahira ana te pukapuka a Reweti i o kupu ahakoa kihai i tatangi to reo. Na te pai o te manaaki a o kaimahi i taea ai, no reira me mihi , me mihi, me mihi whānui.

Kei te tangi atu hoki, kei te mihi aroha atu, ki te whānau a Reweti rāua ko Keita, ki te whānau whānui o nga Kohere mo rātou i whakaae mai ki te tā i ēnei tuhituhinga. E koutou mā nga uri o te kāwai i heke mai i te tīpuna i a Pākura, i a Mokena rāua ko Kakatarau hoki, tēnā koutou i runga i nga manaakitanga a te Runga Rawa.

He mihi hoki ki a Ngarangi ta māua pōtiki nāna nei te mahi nui ki te hoatu i nga kōrero nei ki roto o te mīhini roro hiko.

Kia ora huihui mai tātau.

Te Ohorere me Wiremu Kaa