Gloomy Winters Noo Awa.

Gloomy winter's noo awa',
Saft the westlin' breezes blaw;
'Mang the birks o' Stanley-shaw
The mavis sings fu' cheerie, O.
Sweet the craw-flower's early bell
Decks Gleniffer's dewy dell,
Blooming like thy bonnie sel',
My young, my artless dearie, O.

Come, my lassie, let us stray
O'er Glenkilloch's sunny brae,
Blythly spend the gowden day
'Midst joys that never wearie, O.
Towerin' ower the Newton woods,
Laverocks fan the snaw-white clouds;
Siller saughs, wi' downie buds,
Adorn the Bank sae bricrie O.

Round the sylvan fairy nooks,
Feath'ry braikens fringe the rocks,
'Neath the brae the burnie jouks,
And ilka thing is cheerie, O.
Trees may bud, and birds may sing,
Flowers may bloom, and verdure spring,
But joy to me they canna bring,
Unless wi' thee, my dearie, O.