3. E maha ana nga hahi i roto i te tino hahi a te Karaiti.

I mea ahau i naianei—he hahi kotahi te hahi a Ihu Karaiti. He pono ra, ahakoa e tini ana ano nga hahi o roto i a ia. "E hara hoki te tinana i te wahi kotahi, he tini ia." 1 Koriniti 12, 14. Nakoa tatou ka korero i te karaipiture, e mea ana, "a, ka okioki nga hahi puta noa i Huria katoa, i Kariri, i Hamaria, a, ka whakakahangia." Nga Mahi, 9, 31. "Ekore ano hoki ahau anake e whakawhetai atu ki a raua, otira, ko nga hahi katoa hoki o nga tau iwi." Roma 16, 4. "Ko o matou teina ranei te rapua ana, he apotoro ratou no nga hahi, he kororia no te Karaiti." 2 Koriniti 8, 23. "Kua whakatau hoki koutou e hoa ma, ki nga hahi a Te Atua i Huria i roto i a Karaiti Ihu." 1 Teharonika 2, 14. "Kua tonoa e ahau e Ihu taku anahera kia korero ki a koutou i enei mea i roto i nga hahi" Whakakitenga 22, 16. Me te tini noa iho o nga korero penei.

Na, kia maharatia e koe te tikanga maori o tenei kupu i tona reo ake ano, koia ia, he whakaminenga tangata. Ano ka huihuia katoatia nga tangata a Ihu Karaiti, o tenei hahi, o tenei hahi, kotahi rawa ano tino hahi me taku i mea nei inaianei. Heoi, he hahi ano nga whakaminenga tangata karakia katoa, ko ia whakaminenga, ko ia whakaminenga, "kei reira ano te kupu pokenga kore a Te Atua e kauwhautia ana, kei reira ano hoki nga hakarameta e minitatia tikatia ana, ki te tikanga o ta te Karaiti whakaritenga iho." Koia tatou ka kite nei i roto i te karaipiture, e mea na, ko te hahi o Epeha, te hahi o Perekama, o Taiataira, o he, o hea. Ahakoa torutoru nga tangata o taua whakaminenga, he hahi ia no Te Atua. I mea hoki te Karaiti, "Ko te wahi kua whakaminea te hunga tokorua, tokotoru ranei, ki toku ingoa, kei reira ahau kei waenganui i a ratou." Matiu 18, 20. Ko ta Paora hoki, "Kia owha ano ki te hahi i to ratou whare." Roma 16, 5. "Ki tetahi hoki i tou uhare" Pirimona 2. Waihoki, "ko te ritenga i te timatanga kia pera aianei." Kua tukua rawatia iho ano tena ritenga ki a page 10 tatou. Mau tonu ia i nga whakapaparanga katoa, mohoa noa nei. No reira te tini o nga hahi ka kite nei tatou, ara, ko te hahi o Ingarani, o te Weteriana, o nga Papitiha, o nga Karawini, o Ruta, o Morewia, me te tini noa atu e kore e taea te whakataki. Heoi, ko tahi ano ratou katoa. Ina, ta Epeha 4, 5. "Kotahi Ariki, kotahi whakapono, kotahi iriiringa." Kotahi ano to ratou turanga, "He mea hanga i runga i te turanga o nga apotoro, me nga poropiti, ko Ihu Karaiti ano hei tino kamaka mo te kokonga." Epeha 2, 20. Kotahi rawa upoko no ratou katoa, ko te Karaiti. E hara hoki ratou i a ia, ki "te kore e mau ki te upoko mana nei te tinana katoa, ua oti te whangai te whakakaha ki nga ponapona, ki nga herenga, ka nui haere ai ki te whakanuinga a Te Atua." Korohe 2, 19. Kotahi hoki ture no ratou katoa; ko nga karaipiture tapu. "No te hahi o Te Atua te karaipiture katoa, a, e pai ana mo te whakaakoranga, mo te riringa, mo te whakatikanga, mo te whakaakoranga ki te tikanga; kia rite ai te tangata o Te Atua, he mea whakarite ki te mahi pai katoa." 2 Timoti 3, 16. 17. Kotahi ano hoki kai whakaora mo ratou katoa, ko Ihu ia ko te Karaiti. "Kahore hoki he oranga ki tetahi atu; kahore hoki he ingoa ke atu i raro o te rangi kua ho mai ki a tatou e ora ai tatou." Nga Mahi 4, 12. Me te Wairua Tapu hoki. Kotahi ano la hei kai mahi i roto i a ratou katoa. Ahakoa "poka ke nga mea e ho mai ana, kotahi ano ia Wairua. Na, ko anei katoa e mahia ana e taua Wairua kotahi, ko ia hei tu wha ki tetahi, ki tetahi, me tana e pai ai." 1 Koriniti 12. 4, 11. Waihoki, kotahi tonu ano to ratou kainga tumau e takoto ake nei, mo te mea, "e whakakotahitia te kainga, kotahi ano hoki te hepara." Hoani 10, 16. Koia ahau i mea ai, he hahi kotahi te hahi o te Karaiti "Me te tinana hoki e kotahi ana, a, he tini ona wahi, a, ko nga wahi katoa o taua tinana kotahi, ahakoa tini, kotahi ano ia tinana, e penei ana hoki a te Karaiti." 1 Koriniti 12, 12. Na, koia ano "te hahi a Te Atua i hokona e ia ki ona toto." Nga Mahi 20, 28. E rite ana hoki ki te rangatiratanga o tenei ao. Ahakoa tini nga page 11 whenua me o ratou ritenga ake ano, kotahi rawa ano tino Kingi o taua rangatiratanga. Me te whare hoki. Ahakoa kotahi ia, he tini ona ruma o roto, "Ko etahi mo te honore, ko etahi mo te honore kore." 2 Timoti 2, 20. Waihoki, ko nga hahi katoa e u ana ki te tino ritenga tapu o te Karaiti, ahakoa karangatia ana ki te ingoa o te hea tangata ranei, o te hea whenua ranei, kotahi ano ia temepara mo Te Atua. "I a ia hoki koutou e hanga tahitia ana hei nohoanga mo Te Atua i te Wairua." Epeha 2, 22. Heoi rawa ano te mea he, he whakakake, he wehewehe. Ko ia ia, ko te tangata e tohe ana, nona anake te hahi pono. "Tenei ra ia kua whakanohoia e Te Atua nga wahi katoa takitehi ki te tinana me tana ano i pai ai. A, me he mea, kotahi ano wahi, nga wahi katoa, kei hea te tinana? Otira, he tini nga wahi, kotahi ano ia tinana. A, e kore te kanohi e ahei te mea atu ki te ringaringa, kahore aku mate ki a koe; e kore ano hoki te matenga e ahei te mea atu ki nga waewae, kahore aku mate ki a korua. Na, ko koutou te tinana o te Karaiti me nga wahi pu ano." 1 Koriniti 12, 18, 21, 27. Otira, ko ratou katoa e mahi ana i te he, e hara ratou i tana tino hahi, mo te mea, "Kei waho nga kuri, me te hunga makutu, me nga kai kohuru, me te hunga karakia ki nga whakapakoko, ko ratou katoa hoki e pai ana e mahi ana i te teka." Whakakitenga 22, 15.