Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

The Pamphlet Collection of Sir Robert Stout: Volume 63

IV. Ko nga tangata o te Hahi a Ihu Karaiti

IV. Ko nga tangata o te Hahi a Ihu Karaiti.

"Ma konei ka matau ai nga tangata katoa, ko koutou aku akonga, me e aroha ana koutou te tahi ki te tahi." Hoani 13. 35.

"Ko te hunga hoki no Iharaira, e hara ratou katoa i a Iharaira." Roma 9. 6. Waihoki, ko nga tangata katoa o nga hahi i tenei ao, e hara ratou katoa i te tino hahi a Ihu Karaiti. Me nga tangata o Iharaira i mua, e whakakake ana, e pera ana ano hoki e tahi inaianei. I mea hoki ratou, i whiwhi ai ratou ki te oranga tonutanga, he tamariki ratou no Aperahama. I meinga hoki e ratou, nga tau iwi katoa he kuri. Ka rite hoki ki ta etahi ka rongo nei tatou. Ka korero whakakake ratou, mea ana, no ratou anake te hahi pono, a whakahe ana ki era atu katoa. Otira, he mea he tenei ki ta Te Atua titiro. Nana hoki i mea ki nga hurai i mua, "kei timata koutou te mea ki a koutou, ko Aperahama to matou matua, ka mea atu hoki ahau ki a koutou. E taea e Te Atua te whakaaro tamariki mo Aperahama i enei kowhatu." Ruka 3. 8. Ko ta Paora hoki, "E hara ratou katoa i te tamariki, i te mea, he whanau na Aperahama, otira, ka karangatia he whanau mou i a Ihaka. Ara, ko nga tamariki o te kikokiko, e hara enei i te tamariki o page 23 Te Atua; otira, ko nga tamariki o te korero oha te meinga ana ko te whanau." Roma 9. 7, 8. E kore hoki Te Atua e titiro ki to waho o te tangata, "a kahore ia i pai ake ki tetahi i tetahi." Korohe 3. 25. Heoi, ko te ngakau ano te mea e rapua ana e Te Atua, kia tika, haunga te ingoa ranei, te hahi ranei, te rangatiratanga ranei, te aha ranei o te tangata. Heoi ano te mea pai, ko te aroha o roto o te ngakau. "Ahakoa ka ho atu e ahau aku taonga katoa hei whangai i te hunga rawakore. Ahakoa ka tukua atu toku tinana kia tahuna, ki te kahore he aroha, kore rawa aku painga," I Koriniti 13.3. Otira, ko te tangata katoa, kowai ranei ia, no tehea hahi ranei, ki te whakapono ia i roto i tona ngakau, e ora. "He pono, e kite ana ahau e kore Te Atua e whakaaro ki te kanohi o te tangata; otira, i nga iwi katoa, ko te tangata e wehi ana i a ia, e mahi tika ana, te paingia ana e ia." Nga Mahi 10. 34, 35. "Kahore hoki he putanga ketanga o te Hurai ranei, o te kariki ranei; ko taua Ariki tonu hoki o nga tangata katoa, e atawhai ana, ki a ratou katoa e karanga ki te ingoa o te Ariki e whakaorangia." Roma 10. 12, 13. "I a Karaiti Ihu hoki, kahore te kotinga i whai wahi, kahore ano hoki te kotinga kore, otira, ko te whakapono e mahi ana ki te aroha." Karatia 5. 6. Na, ko ratou katoa, e meinga ana e te Karaiti, he wahi ora no tona tinana:—