Taha ki te Moni.

Ma te Kawanatanga e nama atu he moni ki te Poati, nga moni e tika ana mo te whakahaere-tanga, mo nga ruri, me nga whakapainga. Ko aua moni me whakautua e te Poati i roto o nga moni ka puritia e te Poati i runga i nga whenua Maori katoa.

I nga whakahaerenga whenua a muri nei i te mea kahore e mau takitahitia ana me hoki ano ki nga tikanga o mua i waenga i nga hapu. Ma te whakatunga o nga Komiti i runga i te ahua o te Pooti, e hoki mai te wahi pai o te mana o nga rangatira.

Ko nga tikanga o mua whakawhaititia iho ki te ahua me nga ritenga hai pupuri e tautokona ana hoki e nga ture, ki to matou whakaaro tera e pai rawa atu i te tare e whakahaerea ana i naianei. He iti te moni mo te whakahaeretanga, he marama, ma konei e nohoia ai te whenua e te tangata.

Ki te mea, ka kiia e kore te Maori e kaha ki te whakahaere i enei mea mo to ratou nei ano mahi, ka korero matou ki nga whaikorero tino whakaaro nui i korerotia mai ai kia matou e te iwi Maori. Me titiro hoki ki nga motini maha, hangai, whaitikanga, i puta i tetahi hui nui ki te Wairoa; e waru nga ra e whiriwhiri ana taua hui, ko ratou anake, tino whai matauranga, whakaaro nui o ratou whiriwhiringa. Kahore e ngaro ana te whakaaro nui o te iwi Maori. Heoi, e tika ana kia whiwhi ai ratou ki te mana whakahaere i o ratou nei tikanga.

Me whai mana nga Komiti o ia takiwa ki te whakatakoto rahui i nga wahi ano i tohungia e te hunga no ratou te whenua i roto i te runanga. Ko te toenga o te whenua me tuku ki te reti i raro i nga tikanga i hangaia e te Poati Whenua Maori, me te whakaae o te Kawana i roto o tona Kaunihera. Ko te Kawanatanga anake e whai mana ki te tuku moni i runga i te nama ki te Poati, ki te tangata ranei.

Ko te Komihana o ia takiwa hei tiamana mo ia Komiti, ko ia hei tiaki i nga mahi katoa, me te wehewehe i nga moni katoa.