[Translation.]
No. 12.—Pukakuka-inoi a Hemana Whiti.

E ki ana te kai-pitihana i whai paanga ia ki tetahi whenua ko Okahukura te ingoa, Takiwa o Kaipara, i hokona taua whenua e nga Maori ki a Whititera, na ahakoa te tohe a Whititera me nga Maori kihai rawa ia i whakaae ki te hoko i tona wahi; i te whakawakanga a te Kooti Whenua i taua whenua i kiia ponotia mai ki a ia e kore tona wahi e whakaurua ki roto ki te hoko; na te Kaiwhaka-Maori a Whititera, na Tare Nerehana, a ia i tohe kia whakaurua tona paanga ki roto ki te hoko a etahi Maori ki a Whititera, he mea ano kia pai ai, a ma Whititera e whakahoki ano tona piihi ki a ia; i whakaotia taua whakaritenga i maharatia nei e ia he mea pai i runga ano i te whakahau a Haimona, a Te Kerenena, me Tuwha; i whakaritea me utu e ia e £50 ki a Whititera mo page 18taua Whenua; i utua e ia taua £50 me te £20 mo te ruri ki a Te Kerenena; na no te otinga o te ruri o tana piihi kihai i whakaae a Whititera kia noho ia i runga, erangi whakawakia ana ia i roto i te Hupirimi Kooti hei tango i taua piihi; i puta ko Whititera i roto i taua whakawa a whakaputaina ana he warati hei mea kia utu te kai-pitihana i nga moni o te whakawa; i noho tonu te kaipitihana i runga i te whenua a na Whititera me ona pirihimana i pana ia; ko ona whare me ona taonga i tahuna ki te ahi; me ona hoiho katoa i murua; i tonoa atu e te Kawanatanga a Meia Mea hei tirotiro i taua mea na i ki ia me utu a Whititera mo nga mea i kino i a ia, a ko te kai-pitihana me haere atu i runga i te whenua kia ahei ai te Kawanatanga ki te ata whakatau i taua raruraru; na e ki ana te kai-pitihana kaore ano enei mea kia mahia no reira ia ka inoi ki te Paremete kia whakaorangia tona mate.

Kua whakahaua ahau kia ki penei:—

I runga i nga korero kua tae mai ki te Komiti, ara, a Te Whitika me a Te Kerenena e kitea ana e tika tonu ana nga korero a te kai-pitiana, a i pa ano tetahi mate nui ki a ia. Kaore e mohiotia he oranga i runga i te huarahi o te ture. E whakaaro ana te Komiti he mea tenei e tika ana kia tonoa atu ki te Kawanatanga kia whakamatautia me kore e oti i roto i tetahi Kooti Whakawa, a ki te kore e taea i runga i nga tikanga a te ture me whakaaro ano tetahi whakaritenga e taea ai tetahi piihi whenua te hoatu ki te kai-pitihana hei utu mo tona piihi i whanakotia nei i a ia, a me hurihuri ranei me kore e taea te hanga tetahi Ture hei whakatika.