[Translation.]
No. 31 of 1882.—Pukapuka-inoi a Hori Ohomairangi me etahi e 328.

E Ki ana nga kai-pitihana ko o ratou whenua (kaore i homai nga ingoa erangi pea ko Pukekura raua ko Puahoi) i whakataua ki nga tangata kotahi te kau, na kaore ratou i matau ki te tikanga o taua mahi, heoi he inoi tenei na ratou me kore e kitea he huarahi e taea ai ano ratou te whakauru ki roto ki to ratou whenua.

Kua whakahaua ahau kia ki penei:—

Ko tenei whenua i Karauna karaatitia i runga i te here kia kore ai e taea te hoko, erangi i mana te riihi mo nga tau e 21 timata mai i te 17 o Tihema 1869; kua riihitia taua whenua; ko te mahi a nga pakeha kei a ia taua whenua he tonotono ki te Kawanatanga kia tangohia te here arai i te hoko, e mea ana hoki nga pakeha kua oti te hoko te nuinga o nga paanga o nga tangata o roto i te Karauna karaati; na tae mai ki naianei kei te whakakore tonu te Kawanatanga ki te tango i taua here. E mea ana tenei Komiti me kaua e tangohia te here, me tenei kupu ano hoki a te Komiti ki te Kawanatanga kia tino whiriwhiri ratou me kore e taea te tuku mai tetahi Pire hei whai tikanga mo nga whenua e uru nei te tokoiti ki roto ki te karaati, a e ahei nei aua tokoiti ki te hoko i te whenua e whai take ana to ratou iwi katoa ki runga.