[Translation.]
No. 61 of 1881.—Pukapuka-inoi a Paora Kaiwhata me etahi 6.

E Ki ana nga kai-pitihana he maha nga tau e noho ana ratou i runga i te whenua i Ngatahira; i tae atu a Te Paraihe me Te Roretana kia kite i a ratou ki te whakaoti i nga tautohe mo te take ki taua whenua; i whakahaerea ano etahi tikanga kia utua taua whenua ki tetahi whenua ke atu, engari kaore i whakaotia ana whakaritenga; kaore ano he kupu a te Kawanatanga i tae atu ki a ratou no reira ka inoi ratou kia whakahokia a Ngatahira ki a ratou.

Kua whakahaua ahau kia ki penei:—

Me rapu mehemehea ranei na te Kooti te he i kore ai e mana te hiahia o nga Maori no ratou te whenua kia mau tonu taua wahi ki a ratou hei whenua mo te iwi, no te mea hoki he nui ratou nga Maori kua panaia i runga i te whenua i maharatia nei kua oti i te ture te whakatau ki a ratou. Na ki te whakaaro a tenei Komiti i mahara tonu nga Maori me te pakeha hoko, ko te whenua ke e hokona ana ko te whenua i riihitia ki a Te Paratiweeti, i runga i tena tikanga e kapea ana a Ngatahira ki waho o te hoko. Na he maha nga Kawanatanga kua whakamatau ki te whakaoti i tenei raruraru, heoi ano te mea i oti ko te tango i te ora kotahi nei o te Maori, ara; i tona whenua; na i runga i nga korero me nga pukapuka kua takoto ki te aroaro o te Komiti i puta pai nga Maori ki waho o taua whenua i runga i te whakapono tera ano ratou e whakahokia ki runga, Na i runga i te huarahi o te tika me whakahoki pumau ano nga kai-pitihana me o ratou hoa ki runga ki to ratou whenua o mua iho. Na ma tona Tari tika ano e kimi mehemea ranei i pono te oatitanga i tuturu ai te take o taua whenua i raro i te Ture Tuku. Na ki te kitea i pohehe te hoko a te pakeha, me utu ano ia i raro i nga tikanga o te Ture mo nga mahi Nunui e mana nei. Na me tere tonu te whakahoki a te Kawanatanga i nga Maori ki runga ano ki to ratou whenua, me kaua hoki nga Maori e utu whenua e utu moni ranei.