[Translation.]
Ko te Kupu a te Komiti mo runga i te Pukapuka-inoi a Nepia Pohuhu me etahi atu. (No te tau 1876, i tukua mai ai.)

Ko tenei pukapuka-inoi no tera tau i tukua mai ai a i whakahokia mai notemea kahore te Komiti mo nga mea Maori o tera tau i whai kupu tuturu ki te Whare:—

E ki ana nga kai-inoi i hokona hetia etahi whenua i Wairarapa, a e whakaatu ana i nga take maha hei whakakaha i to ratou whakaaro pera, ko etahi o aua take kihai i ata kitea te tikanga.

Ko etahi o o ratou tono kia whakahokia te whenua ki a ratou, ko etahi kia utua he moni ke atu.

Kua whakahaua ahau kia ki penei atu ki te Whare:—

Kua roa te kimihanga a te Komiti i te tikanga o tenei pukapuka-inoi ara kua pataia a Te Kupa (Mr. Cooper), Hekeretari-Tuarua o te Koroni, a Te Karaka (Mr. Clarke), o te Tari Maori me nga Maori tokotoru. Engari ki te whakaaro o te Komiti kahore nga kai-inoi i whakatuturu i tetahi take e tika ai kia tahuri te Kawanatanga ki te kimi i nga tikanga o tenei mea, kahore hoki te Komiti i whakaaro ka puta he tikanga tuturu i taua kimihanga ina tu.