[Translation.]
Ko te Kupu a te Komiti mo runga i te Pokapuka-inoi a Aropeta Haeretuterangi ma.

E ki ana nga kai-inoi i whakataua ki a ratou ko etahi atu e te Kooti Whakawa Whenua Maori ki Whanganui i te tau 1873, tetahi piihi whenua ko Murimotu te ingoa, tona nui 46,353 nga eka a kua kitea i muri iho nei e nga kai-inoi kua whakaurua hetia etahi tangata Maori ki roto i nga kai-tono ahakoa kahore o ratou take tika ki te whenua. Ko aua tangata i whakaurua hetia ra e hiahia ana inaianei ki te hoko topu i te whenua engari e hiahia ana nga kai-inoi kia nohoia taua whenua kia hokona piihitia te whenua. A e mea ana hoki ratou ki to kore te he ra e whakatikaia ka waiho taua mea hei take raruraru ki nga tangata tuturu katoa o te whenua.

Koia i tono ai nga kai-inoi kia whakawakia tuaruatia taua whenua katoa e te Kooti Whenua Maori.

Kua whakahaua ahau kia ki penei atu ki te Whare:—

I runga i nga korero i whakapuakina i te aroaro o te Komiti kahore i rite te kupu nei ara i whakaurua hetia etahi ingoa ki te rarangi ingoa o nga tangata no ratou te whenua. Kei nga pukapuka o te Kooti te whakaaturanga kahore ano i tino whakaotia te whakataunga a te Kooti Whakawa Whenua Maori. Heoti ano ta te Kooti he whakatuturu ki nga pukapuka o te Kooti i nga tangata e whai tikanga ana i runga i te tikanga Maori kia uru ki taua whenua. Engari i mua o te whakaotinga o te whakataunga a te Kooti me whiriwhiri nga ingoa o nga tangata kotahi tekau mo te Tiwhikete. Kua whakamatauria tenei i muri iho o te 1873 kihai i taea i runga i nga tautohe a nga tangata Maori no ratou te whenua. E kore rawa e taea te whakarite te tono a nga kai-inoi mehemea ia e tika ana kia whakaritea kia oti ra ano te tino whakataunga a te Kooti.