[Translation.]
Ko te Kupu a te Komiti mo runga i te Pukapuka-inoi a Tapa te Whata ma (Nama 2).

E ki ana nga kai-inoi i tae ki a ratou i te marama o Akuhata, 1868, nga Kahiti i panuitia ai tetahi nohoanga o te Kooti Whenua Maori kia tu ki Waikato i te 3 o nga ra o Nowema, kia tu hoki ki Rangitikei i te 4 o nga ra o taua marama ano. I runga i ta ratou korenga e ahei ki te haere ki era Kooti e rua ka ui ratou ki te Kawanatanga kia tohutohungia atu ki a ratou kia haere atu ranei ratou ki te Kooti i Waikato, kia noho ranei ki te Kooti i Rangitikei, a ka puta te kupu tohutohu ki a ratou me noho ratou ki te Kooti i Rangitikei, a ka nukuhia te Kooti i Waikato ki tetahi atu wa. Engari e ki ana nga kai-inoi kihai i rite taua kupu a te Kawanatanga, ara kihai i nukuhia taua Kooti, a tae rawa atu te tono mo te whakawa tuarua kua pahure te wa i taea ai te whakaae. Koia i tono ai nga kai-inoi kia whakamaramatia he huarahi ma ratou e ahei ai ratou ki te whakatuturu i o ratou take.

Kua wnakahaua ahau kia ki penei atu ki te Whare:—

E marama ana kahore nga kai-inoi i tae ki te Kooti i Kemureti (Waikato), te take, he kupu na te Kawanatanga kia noho ratou ki te Kooti o Rangitikei me te kupu hoki a te Kawanatanga i taua wa tonu ka nukuhia te whakawakanga o nga whenua i whai tikanga ai ratou.

Ki te whakaaro o te Komiti e whakaaturia ana e te pukapuka-inoi tetahi mate nui i tupu ake i roto i etahi tikanga ekore nei e tika kia kiia na nga kai-inoi te he.

Kahore te Komiti e ahei ki te ki mehemea ranei e whai take tuturu ana nga kai-inoi ki nga whenua i whakawakia ra ki Kemureti i mate ai ratou, ki to ratou ki, i taua whakawakanga.

E maharatia ana kua hokohokona ki te pakeha e nga tangata, i whakataua ai nga whenua i te Kooti i Kemureti, te nuinga o te whenua e tonoa ana e nga kai-inoi; a, ekore e taea te whakanoho i a ratou ki reira. Engari e tohutohu atu ana te Komiti kia mahia he ture i tenei nohoanga o te Runanga e ahei ai te whakatuturu e te Kooti Whenua Maori e tetahi atu Tikanga Whakawa ranei mehemea i whai take ano nga kai-inoi ki nga whenua i whakahuatia e ratou, a ma te Kawanatanga e whakarite te huarahi e ea ai nga take e taea e nga kai-inoi te whakatuturu.