[Translation.]
Ko te Kupu a te Komiti mo runga i te Pukapuka-inoi a Hotereni Taipari me ona hoa e 73.

E ki ana nga kai-inoi ko ratou nga tangata i tuhituhi i tetahi Pukapuka Whakaaetanga ki te Kawanatanga i whakatuwheratia ai etahi whenua i Hauraki hei mahinga koura. A i runga i taua whakaaetanga i meatia kia utua ki nga kai-inoi nga moni e puta ake ana i nga maina raiti me etahi atu mea, engari kahore i tika te utunga inahoki kahore ano i utua mo nga koata etoru o te tau, koia i hiahia ai nga kai-inoi kia tirohia tikatia nga pukapuka o aua moni e tetahi tangata mohio kia whakaturia e ratou ano, engari kahore ano tera mea i tukua; e ki ana hoki ratou e ngaro ana etahi moni i tika kia whiwhi ai ratou i runga i te mahinga a etahi tangata i ta te kai-keri koura mahi i te mea kahore aua tu tangata e utu.

Kua whakahaua ahau kia ki penei atu ki te Whare:—

E rite ana tenei Pukapuka-inoi ki tetahi i homai i tera tau i whiriwhiria e te Komiti mo nga mea Maori i tera nohoanga o te Runanga. Ko te kupu a te Komiti i tera tau kia whakatuwheratia he huarahi e rite ai te hiahia a nga kai-inoi kia kite ratou i nga pukapuka moni i whakamana ano e te Kawanatanga a i puta ta ratou kupu pera ki a Te Paki te Apiha a te Kawanatanga i Hauraki. E whakaaro ana te Komiti e he ana tenei kupu a nga kai-inoi, ara, i tae he tono ki a Te Paki kia whakaaturia ona pukapuka a kihai ia i whakaae; engari kahore he tono i tae ki a ia ekore hoki e araia te tirohanga i nga pukapuka moni. Na, heoi ano hoki te kupu ma te Komiti he whakapuaki ano i ta ratou kupu o tera tau kia whakatuwheratia he huarahi ma nga kai-inoi kia kite ai ratou i nga pukapuka moni o nga maina raiti me era atu moni e whai tikanga ai ratou ahakoa i roto i te tari o Te Paki o tetahi atu Apiha ranei o te Kawanatanga.