[Translation.]
Ko te Kupu a te Komiti mo runga i te Pukapuka-inoi a Meiha Kepa te Rangihiwinui.
E ki ana te kai-inoi i uru te iwi Ngarauru ki te mau patu ki a te Kuini a whiua ana ratou i runga i te tangohanga o o ratou whenua, otiia he tangata piri pono tonu te kai-inoi ratou ko tona iwi ki a te Kuini, a e whai tikanga ana ratou ki aua whenua i tangohia ra.
E ki ana hoki te kai-inoi i whakataua ki a ia tetahi whenua i te takiwa o Waitotara, e 400 eka, hei whakaea i aua tikanga engari no muri iho ka kitea kua oti taua whenua te riihi ki tetahi Pakeha ko Vincent te ingoa a no reira ka tupu ake nga raruraru kua oti te whakaatu i roto i te pukapuka-inoi.
E ki ana to kai-inoi i whakaae ia ki tetahi tikanga e whakaarohia ai he kai reti ia ki a Vincent a kua tono ki a ia nga kai-whakahaere a Vincent kua mate nei kia tuhi ia i tona ingoa ki te pukapuka riihi, engari i te mea e whakaae ana ano ia ki te whakaoti i te whakariteritenga e mahara ana ia me matua whakaputa te Karauna karaati ki a ia.
Kua whakahaua ahau kia ki penei atu ki te Whare:—E pouri ana te Komiti notemea kahore ratou i whai taima ki te uiui i nga tikanga e taea ai e ratou te whakaputa i tetahi whakaaro ma ratou mo runga i nga kupu o tenei pukapuka-inoi.
John Bryce,
Tumuaki.