Ki Te Kai-tuhi, Tari Maori, Poneke.

Ki taku whakaaro no Ngatimaru a Matiu Poono ratou ko ana hoa na ratou te pukapuka-inoi. Mehemea e tika ana tena me ki atu ahau i ata kapea ki waho o te ruri o nga whenua ki Piako i te tau kua hori nei te wahi e kiia ana e ratou no ratou. Heoi ano nga wahi i whakahaerea e au ko nga whenua o Ngatipaoa nga wahi i hokona e ratou i Hauraki. Kua oti katoa nga ruri. Heoti ano te ruri kei te whakahaerea inaianei kei Waitoa e tata ana ki Ohinemuri i tukua e Ngatitamatera a kahore rawa a Matiu Poono ratou ko Ngatimaru e kaha ki te ki e whai paanga ana ratou ki reira ahakoa iti noa iho. Kia pai nga rangi kia ahei ai te ruri i nga wahi repo, e mea ana ahau kia whakaotia te ruri o Piako a mehemea ka pa tetahi wahi ka tata ranei ki nga wahi e kiia ana e Ngatimaru e Matiu Poono ranei no ratou ka tukua e ahau he panui ki a ratou kia haere atu ratou ki te tohutohu i o ratou rohe. Me tino whakahe te mahi arai tona putake nei he whakaroa kau a mehemea e mahia tupatotia ana kia tae te ruri ki nga wahi o Ngatipaoa o Ngatitamatera anake kia kapea atu nga wahi e pa ai—ahakoa iti noa iho nei te paanga—a Ngatimaru kahore ahau e whakapono he take pouri to ratou. Mehemea e hiahiatia ana tetahi atu kupu mo tenei mea, patua mai nga ingoa o nga kai-inoi i runga i te waea.