Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of the Native Affairs Committee, 1876.

[Translation.] — Ko te Kupu a te Komiti mo runga i te Pukapuka-inoi a Wi te Wheoro

[Translation.]
Ko te Kupu a te Komiti mo runga i te Pukapuka-inoi a Wi te Wheoro.

E whakapuaki ana te Kai-inoi i tona pouri mo te whakahaerenga o te raina o te rerewe o Waikato i runga i tetahi urupa tawhito tapu rawa kei Taupiri i te awa o Waikato, mo te whakatunga hoki i nga whare maha ki reira, e tono ana hoki ia kia tere tonu te whakaputanga o te Karauna karaati hei whakatuturu i tono take ki taua whenua.

Kua whakahaua ahau kia whai kupu penei ki te whare:—

Mo runga i te kupu tuatahi kua kitea e te Komiti e tika ana te kupu i roto i te pukapuka-inoi; kua haere te raina o te rerewe i runga i tetahi urupa tawhito kua hurahia ake nga wheua o etahi o nga tupapaku.

page 3

Otira e kitea ana kua kore e taea te whakarere ke i te raina o te rerewe notemea he nui rawa atu to moni e pau he nui hoki te raruraru ki te tiki i nga kirikiri hei whakaoti i te raina. E whakaae ana ano nga Maori e ahua he ana ratou inahoki kihai i tere ta ratou tono i mua atu o te otinga o te mahi.

Mehemea ka kawea ketia te raina ka pau te moni neke ake i te wha mano pauna (£4,000), ka kino hoki nga kopikopikonga o taua raina ka ikeike nga pikitanga.

No runga i enei tikanga i kore ai te Komiti e marama kia whakaarohia te tono a nga Maori kia kaua e pokanoa ki runga ki taua urupa; engari e kitea ana i te korero a Mr. Knorpp i te aroaro o te Komiti kahore he tikanga e peka ke atu ai te rerewe ki runga ki taua whenua, e mea ana te Komiti me taiepa taua urupa me tiaki atu ranei kei pokanoa te tangata ki reira; me whakahaere ranei i tetahi tikanga e mohio ai nga tangata Maori e whai ritenga ana ki reira kahore te Kawanatanga e hiahia kia whakakinongia nga tupapaku Maori. Mo te kupu tono mo te Karauna Karaati o te whenua, e ki ana te Kai-inoi he porowhita e 20 eka i whakatakotoria e Te Make i mua mo te Kai-inoi ratou ko tona iwi, mehemea ko taua porowhita taua urupa e whakahuatia nei kahore he take, ki ta te Komiti titiro, e kore ai e whakaputaina te Karauna karaati, engari me tiaki te tikanga o te katoa mo runga i te raina o te rerewe.

John Bryce, Tumuaki.

Hurae 25, 1876.