Haterei, te 21 o Oketopa, 1899.
Rahui Maori.

Te Mete, i motini, "Kia mahia mai tetahi pukapuka whakaatu mai i nga rahui Maori katoa o roto o te koroni nei, a me tuku mai kia takoto ki te teepu o te Kaunihera i roto i te wiki kotahi o muri o te tuwheratanga o tera hnihuinga mai o te Paremete; me whakaatu mai i nga huarahi i rahuitia ai aua whenua hei rahui Maori, ara—mehemea ia he mea karaati e te Karauna, he mea wehe atu ranei i te hokonga o te nuinga atu o te whenua; me whakaatu mai hoki to wa i whakaritea ai aua rahui, me nga eka, me te takiwa e takoto mai ai aua rahui, he whenua e taea ana te parau te whakatupu taonga, he whenua oranga kararehe ranei; e nohoia ana ranei aua rahui e te tangata, kaore ranei; kua whakapai ranei te whenua kaore ranei; me whakaatu mai hoki te nui o nga Maori e noho ana i runga i ia rahui; me whakaatu mai hoki mehemea e whakahaerea ana e te Kai-tiaki mo te Katoa, kaore ranei, a mehemea kei te Kai-tiaki mo te Katoa e whakahaere ana, me whakaatu mai nga eka kua wehea atu ki nga Maori whaitake; me whakaatu mai hoki mehemea kua whakawakia e te Kooti Whenua Maori, kua whakataua nga take." He mea tono mai na te Omana kia tukuna atu e au tenei motini i te mea e ngaro atu ana ia, notemea hoki tera e puta mai he painga ina tukuna mai aua mea katoa kua tonoa atu nei, a tera e whakamama i nga mahi a te Kaunihera i tera huihuinga mai o te Paremete, e ka mahia he tikanga mo aua tu rahui.

Te Waaka (Minita mo nga Kura).—Kaore aku nei whakahe atu mo te motini nei.

Whakaaetia ana te motini.