Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Paraire, te 6 o Oketopa, 1899

Paraire, te 6 o Oketopa, 1899.

Pitihana A Te Hauiti Te Waaro Me Etahi Atu (Nama 3).

Te Ripoata a te Komiti mo nga Mea Maori, mo runga mo te pitihana a Te Hauiti te Waaro me etahi atu (Nama 3):—

"Kua ata whiriwhiria e te Komiti mo nga mea Maori te Pitihana Nama 3 a Te Hauiti Waaro me etahi atu, kua ata whakarongo hoki ki nga korero mo runga mo taua pitihana, a e penei ana te whakatau, ara:—

"E ki ana nga kai-pitihana kua pa atu he mate ki a ratou i runga i te whakatau a te Kooti Whenua Maori mo runga mo te roherohenga o te Awarua Nama 4 C Poraka (i te mea e ngaro atu ana ratou) a kua riro atu o ratou whenua kua oti ra i a ratou te whakapai i whakapaua ra e ratou to ratou kaha me a ratou moni ki runga ki aua wahi.

"I te mea kaore i taea e te Komiti te whakarongo i nga korero a Tiati mea nana ra te whakatau e whakahengia nei e ratou, e mahara ana te Komiti ko te mea tika me tuku atu te pitihana me nga whaikorero mo runga mo taua pitihana ki te Kawanatanga kia ata whiriwhiria mai e te Kawanatanga i mua mai o tera huihuinga o te Paremete.

"Wiremu Kere, Tiamana."

Poari Whenua Maori.

Henare Tomoana.—He patai tenei naku ki te Minita mo nga Kura, "Mo awhea ka tukuna mai ai e te Kawanatanga te Pire, i whakaaetia ra e te Pirimia ki nga hui Maori, hei whakatu Poari Maori hei whakahaere i nga Whenua Maori?" I mahia ano taua Pire i tera tau, a i kiia mai ka mahia ano ka whakamana rawatia i tenei tau. I mahara au he mea tika kia pataia atu e au, i te mea hoki kua tata te mutu o te Paremete. Kei te hiahia katoa nga Maori o te Tai Rawhiti kia whakamana taua Ture.

TE Waaka (Minita mo nga Kura).—Kei te mohio ano pea te honors mema na i te korerotia ano aua putake e te Kawanatanga me nga rangatira i haere mai hei mangai mo te iwi Maori, kua tukuna ano tetahi Pire ki tera Whare o te Paremete mo aua take, a mahara ana au tera pea e rite i tera te hiahia o te honore rangatira na.