Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Wenerei, te 13 o Hurae, 1898

Wenerei, te 13 o Hurae, 1898.

No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Ka panuitia tuatahitia etahi Pire, ka mutu era ka whakahaerea te korerotanga tuarua o etahi Pire a ka tae ki nga patai.

Kapiti Motu.

Te Maka (Mr. Monk, mema mo Waitemata).—Ka patai ahau ki te Hekeretari mo te Koroni,—(1.) Mehemea he tika taku rongo kei te tukutukuna he kararehe tia ki Kapiti? (2.) Mehemea he tika taua rongo oku, ka whakaae ranei te Minita ki te whakahau kia kaua aua page 18tia e tukuna kia whiti ki taua moutere, te take ma aua tia e kino ai taua motu, e kore ai e tutuki nga tikanga i tangohia ai taua whenua e te Kawanatanga? (3.) Ka whakaae ranei te Minita ki te whakahau kia taiapatia tetahi wahi rahi wahi pai hoki o taua moutere kia kore ai nga hipi me etahi atu kararehe e uru atu ki reira, kia waiho ai taua wahi i taiapatia ra hei whakamaurutanga mo nga manu Maori, a hei wahi e tupu ai nga rakau me nga otaota Maori?

Timi Kara (Hon. Mr. Carroll, Hekeretari mo te Koroni).—He tika, kotahi te tia toa kotahi te tia uha kua tae ki Kapiti, a kua tukutukuna atu kia haere; engari i te mea kua nui noa atu te nanenane me te kau puihi ki taua moutere, kua kore he tikanga e araia ai te whakanoho tia ki reira. Otira me ata waiho tenei putake ma te Kawanatanga e whakaaro, a ki te kitea kei te pa he kino ki nga manu me nga rakau Maori i aua kararehe, tera e whakahaua kia tikina atu kia nukuhia aua kararehe ki tetahi atu whenua

Te Maka (Mr. Monk) —He tika ranei kia waiho tonu nga nanenane me nga kau kia haere ana i runga i taua motu, i te mea hoki he tikanga ano i rahuitia ai taua motu e te Kawanatanga.

Timi Kara (Hon. Mr. Carroll).—Tera ano e nukuhia aua kararehe ki te kitea kei te kino te moutere i aua mea.

Whenua Maori.

Tame Parata (mema Maori mo Te Waipounamu).—Ka patai ahau ki te Minita mo nga Mea Maori, Mehemea tera e whakahaerea e te Kawanatanga he tikanga e whakamutua ai te mahi whakawai a etahi kai-whakamaori i nga Maori kia riihi ai kia hoko ai ranei i o ratou whenua i runga i te mahi whakawehiwehi atu ki te kore ratou e whakaae tera e murua aua whenua o ratou e te Kawanatanga; a ko tetahi mahi a aua kai-whakamaori he korero tito atu kua haina etahi o nga Maori i nga tiiti o te hoko o te riihi ranei?

Te Hetana (Right Hon. Mr. Seddon, Minita mo nga Mea Maori).—Kaore au i te mohio i te rongo ranei kei te mahi pera etahi o aua tangata. Ki te mahi pera tetahi o nga kai-whakamaori a te Kawanatanga tera e pana taua tangata e whakamutua tana mahi, a ki te mahi pera tetahi kai-whakamaori noa iho, tera e tangohia tona rathana. Ki te whakaaturia mai ki au e te mema honore i tino mahi pera tetahi Apiha Kaiwhakamaori a te Kawanatanga, tera e whakahaerea e au he tikanga e mutu rawa ai i a ia taua tu mahi; a mehemea he kai-whakamaori noa iho nana taua mahi tera e tamgohia e au tona raihana.

Takuta Mo Nga Maori O Murihiku.

Tame Parata (mema Maori mo Te Waipounamu).—Ka patai ahau ki te Minita mo nga Mea Maori, Mehemea ka whakaae te Kawanatanga ki te whakatu i tetahi Takuta hei nana i nga Maori e noho ana i te takiwa o Aparima (Riverton), Kawhakaputaputa me Oraka (Colae Bay), ko aua wahi i mua e tiakina ana e Takuta Nerehana (Dr. Nelson) i mate ra?

Te Hetana (Right Hon. Mr. Seddon, Minita mo nga Mea Maori).—Ka ki, kei te hangaia he tikanga kia whakaturia ko Takuta Tipene (Dr. Stephen) hei whakakapi i te turanga o Takuta Nerehana. Ka whakaturia e te Kawanatanga ko Takuta Tipene hei riwhi mo Takuta Nerehana.

Ka mutu ta Te Hetana ka haere tonu te mahi a te Whare i etahi atu patai, me etahi atu Pire.

No te weherua i te po ka hiki te Whare.