Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Turei, te 12 o Hurae, 1898

Turei, te 12 o Hurae, 1898.

No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Ka panuitia tuatahitia, tuaruatia, etahi Pire, ka tae ki nga motini.

Waihao Rahui Maori.

I runga i te motini a Meiha Tuari, whakahaua ana, Kia whakatakotoria ki te aroaro o te Whare he ritana hei whakaatu i te rahi o nga eka kua hoatu ki nga Maori o Rota 3, Rahui 891, Waihao, i te pito whaka-te-tonga o Katapere, me te whakaatu mai ano i nga ingoa o nga Maori i hoatu ai mo ratou aua wahi, me nga eka i hoatu ki ia tangata o ratou.

Te Pire Mo Nga Karaati Whenua Kura I Porirua.

Te Hetana (Right Hon. Mr. Seddon, Minita mo nga Mea Maori).—Ka tu atu ahau ki te motini kia whakaae mai te Whare kia whakaurua e au he Pire mo taua whenua. Kua whakaaturia e au taua Pire ki te Komiti mo nga Mea Maori i tenei ra. He putake nui rawa tenei, a he mea tika kia tere te mahi a te Paremete i tenei Pire.

He roa te Pirimia e whakamarama haere ana ki te Whare i ana take i mea ai kia whakaurua te Pire. Ka tu ake etahi atu mema ki te korero mo te Pire. Te mutunga iho whakaaetia ana kia uru te Pire ki te Whare.

Ka mutu tenei patai ka haere tonu nga mahi a te Whare, a no te tekau ma waru meneti te paahitanga o te tahi karaka i te po ka hiki te Whare.