Te Pa I Kaiapoi.

Tame Parata (mema Maori mo Te Waipounamu).—Ka patai ahau ki te Minita mo nga Mea Maori, Ka whakaae ranei te Kawanatanga i tenei huihuinga o te Paremete ki te whakauru i tetahi Pire ki te Whare hei whakamana i te Kooti Whenua Maori ki te uiui i etahi mea e pa ana ki te Pa i Kaiapoi a ki te whakatu i tetahi poari hei whakahaere i taua kainga? Me whakamarama atu ahau ki te Whare, ka nui te hiahia o nga Maori o Kaiapoi ki te whakatu i tetahi poari kai-tiaki hei whakahaere i taua piihi whenua, i te mea e hiahia ana ratou ki te whakaara i tetahi kohatu, hei tohu whakamahara, ki runga ki taua wahi tu ai.

Te Hetana (Right Hon. Mr. Seddon, Minita mo nga Mea Maori).—He rite tonu tenei patai ki te patai kua uia nei e te mema honore mo Mataura. Kei te whakatika ahau ki te tono a te mema honore. He pai rawa ki a ahau kia tiakina taua pa, i te mea he pou herenga kupu tera no nga korero o mua; a tenei ano ona tikanga e whakaaro nuitia ai taua wahi e nga Maori e ora nei i tenei ra, a e kore ano hoki e warewaretia e nga Maori me nga Pakeha i roto i nga tau maha e takoto ake nei. He tika kia mahia nga mea e taea ana hei tiaki pai i taua wahi, a hei tuhituhi hoki i nga korero mo taua pa kia mau tonu ai. Me tautoko tenei mea e te Kawanatanga, a ki te kitea ma tetahi ture rawa kia paahitia e taea ai, heoi me whakauru tetahi rarangi poto ki roto ki te Pire Tuku Whakawhiti hoki i nga Rahui. Kaati ra, waiho me ata mahi, a e tino tika ana kia whakamoemiti te iwi Maori me te iwi Pakeha ki te mema honore mo tana whakaarahanga i tenei putake.