Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Te Pa-O-Taonui Me Te Waka Poraea

Te Pa-O-Taonui Me Te Waka Poraea.

Henare Kaihau (mema Maori mo te Tai Hauauru).—Ka patai ahau ki te Minita mo nga Mea Maori, mo a whea te Kawanatanga e pai ai ki te whakautu i te pitibana a Kipa te Whatanui, e tono nei kia whakawakia tuaruatia a Te Pa-o-Taonui me Te Waka Poraka, i te mea kua whakaputaina nga ripoata o te nga tau 1891, 1894, me 1897, me te ripoata ano hoki a te Komiti o te Kaunihera, e mea ana aua ripoata e tika ana nga kereeme me nga pukapuka e pa ana ki nga take o te kai-pitihana, a me te whakahau kia tukua aua kereeme ki te Kawanatanga kia tino whiriwhiria i runga i te ngakau pai i te ngakau rangatira; a i runga hoki i te mohiotanga ake kei tenei Whare Honore te mana o te Kawanatanga, no reira ka inoi tonu atu kia whakaaturia mai e te Kawanatanga tona whakaaro mo tenei pitihana?

Te Hetana (Right Hon. Mr. Seddon, Minita mo nga Mea Maori).—Ko tenei patai he tono kia whakawakia tuaruatia te kereeme a Kipa te Whatanui ki tetahi piihi whenua e mohiotia ana ko Te Waka, e tata ana ki Otaki. Kua oti te whakatau o tenei take i mua, ara, kaua e whakatuwheratia ano taua keehi. Me whakamarama atu ahau ki te Whare, ko tenei whenua kei te Pakeha i naianei, na reira ka uaua rawa te whakatuwhera ano o taua keehi. Ki te whakaaetia he whakawa tuarua mo taua whenua he maha nga tangata e pa he mate ki a ratou, a he nui nga raruraru e puta i taua mahi. Ko nga tiwhikete mo aua whenua he mea whakapula i raro i te Ture Whakawhiti Whenua, a kua maha nga tau e nohoia ana, na reira kaore au i te pai kia whakatuwheratia he huarahi mo nga kereeme e tonoa nei. Kua roa rawa tenei putake e takoto ana, a koia tera tetahi take i kore ai e taea e te Kawanatanga te whakaae atu ki te mea e tonoa nei e te mema honore. He tika, kei te Paremete te mana mo nga ture, otira ki te waiho ma te Kawanatanga e whakahau kia mahia he ture, kaati, ki taku mahara e kore e taea.