Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Nga Rori Maori O Waikouaiti

page 25

Nga Rori Maori O Waikouaiti.

Tame Parata (mema Maori mo Te Waipounamu).—Ka patai ahau ki te Hekeretari mo te Koroni, Mehemea kua whiriwhiria e ia te pitihana a Tiemi Hipi, o Waikouaiti, e tono nei kia whakaturia he Poari mo nga rori o nga whenua Maori o Waikouaiti, kia riro ai ano i nga Maori o taua takiwa te mana whakahaere mo o ratou rori? Kua maha nga tononga a nga Maori me nga hawhe-kaihe o taua kainga ki te Kaute Kaunihera o Waikouaiti kia whakapaia nga rori o to ratou kainga, a kaore ano taua Kaunihera i tahuri ki te mahi. Heoi anake te moni e whakapaua ana ki runga ki aua rori ko nga moni i hoatu e te Whare nei. E toru mano nga eka o taua whenua Maori, a ahakoa kei te utu tonu nga Maori i nga reiti, i nga taake hipi me nga taake kuri, kaore rawa he painga e puta ana i aua taake ki aua Maori. Na reira kua tukua mai te pitihana a aua Maori ki te Paremete he tono kia hoatu he mana ki a ratou e ahei ai ratou ki te whakatu Poari Rori mo ratou.

Timi Kara (Hon. Mr. Carroll, Hekeretari mo te Koroni).—I raro i tekiona rima o "Te Ture mo nga Poari Rori, 1882," e ahei ana nga Kaute Kaunihera ki te whakatu Poari Rori i runga i te pitihana i hainatia e te nuinga o nga tangata utu reiti o roto o te takiwa e tonoa ana mo reira te Poari. I runga i te whakamarama a te mema honore i korero ake nei, mehemea nei kaore ano i pau i nga Maori o Waikouaiti te whakahaere nga huarahi katoa e tuwhera ana i te ture; ara, kaore ano ratou i tuku pitihana ki te Kaute Kaunihera o to ratou takiwa kia whakaturia he Poari Rori mo to ratou whenua rahui i Waikouaiti. Na reira, koia tenei taku kupu ki nga Maori o Waikouaiti, me pitihana ratou ki te Kaute Kaunihera o reira, a ki te kore e whakaaetia to ratou hiahia e taua hunga, katahi ka tika te tono ki te Paremete.

Ka mutu nga patai ka whakahaerea ko etahi Pire.

No te tekau ma waru meneti te paahitanga i te tekau ma tahi o nga haora i te pro ka hiki te Whare.