Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Wenerei, 21 Hepetema, 1898. — Ta Hori Kerei

page 8

Wenerei, 21 Hepetema, 1898.
Ta Hori Kerei.

Te Waaka.—E te Tumuaki, i mua i te mahinga i nga mea kua whakaritea mo tenei ra, me whakaatu atu e au kua tae mai i te ata nei te rongo kua mate a Ta Hori Kerei, a e mohio ana au ka whakaae te Kaunihera kia whakahonore tatou ki a ia, a kia tuhia hoki ki nga pukapuka o te Kaunihera to tatou whakaaro nui mo nga mahi katoa i oti i a ia te mahi. He taitamariki ano ia i tona tuunga hei Kawana mo Atereria Whaka-te-Tonga i te tau 1841, a no muri mai ka tu ia hei Kawana mo Niu Tireni, muri iho ka tu hei Kawana ino te Cape of Good Hope, i te pito Whaka - te - Tonga o Awherika, muri mai, ka hoki mai ano hei Kawana mo Niu Tireni nei tae mai ki te tau 1868, a he nui ana mahi i oti i a ia hei painga mo te katoa, hei painga ano hoki mo te Kawanatanga nui o Ingarani. I tona koroheketanga i noho ia i waenganui i a tatou nei, i uru hoki ia ki nga mahi Kawanatanga o tenei koroni. A i ngakau nui ia ki te whakahaere i ana mea i mahara ai hei painga mo te katoa. Ka motini atu au i enei kupu, ara: E hiahia ana te Whare Kaunihera o te paremete o Niu Tireni kia ata tuhia mariretia tona whakapai mo nga mahi nui i mahia e Ta Hori Kerei hei painga mo Ingarani me ona wahi katoa, tae mai hoki-ki tenei koroni, a e hiahia ana te Kounihera kia tukuna atu ki ona whanaunga to ratou aroha nui me te mihi atu ki a ratou i te wa o to ratou pouritanga.

Henare Tomoana.—E te Tumuaki, e hiahia ana au ki te tautoko atu i te motini kua tukuna mai nei e te Minita e noho mai na. Ko Ta Hori Kerei tetahi o nga tino tangata i noho ki enei moutere, hoki atu nei ki tawahi ki tona kainga mai ano. Ko te nuinga o o matou rangatira Moari kua ngaro ke atu, a kua whai atu nei ia i a ratou. E mea ana au me panui atu e te Kawanatanga te matenga o Ta Hori Kerei kia mohio ai nga maori katoa o Niu Tireni nei. Na te nui o toku pouri i tu atu ai au ki te whaikupu atu whakahonore mo taua kaumatua mo Ta Hori Kerei.

Whakaaetia ana te motini.

Nukuhia ana te Kaunihera mo tetahi atu rangi.