No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka whakahaerea etahi Pire me etahi atu mea ka tae ki nga patai. Ka maha nga patai ka mutu ka tae ki te patai mo:—

Nga Maori Kore Whenua O Te Waipounamu Me Rakiura.

Ko Tame Parata.—Ka patai ahau ki te Minita mo nga Whenua, Kei te pehea nga ruri mo nga poraka whenua i ata wehea nei mo nga Maori kore whenua o Te Waipounamu me Rakiura, ara, mo nga whenua i Tautuku, i Waiau me Lord's River; a mo awhea ra oti ai nga ruri o aua whenua, kia wawe ai te whakanohonoho aua whenua e nga Maori? He maha nga reta a nga Maori o Te Waipounamu kua tae mai ki au, he ui mai mo awhea nga ruri oti ai, a mo awhea aua whenua pai ai mo te whakanohonoho, notemea ka nui to ratou hiahia kia tere ta ratou noho i aua poraka whenua kua ata wehea nei.

Ko Te Makenehi (Hon. Mr. J. McKenzie).—Koia tenei te utu mo te patai, ara, me panui atu e au te reta mai a te Tari ki au:—

"Ko nga ruri o nga piihi i ata wehea nei mo nga Maori kore whenua kei te pai te haere, heoi te mea kei te whakaroa ko te whakariterite a nga Komihana i nga tekihana ma ia Maori ma ia Maori e whai tikanga ana ki aua whenua. Ko te ruri o te rohe o te whenua i Tautuku, wahi o Otakou, kua tata te oti, a kua timataria hoki te ruri o nga poraka e toru i Waikawa, i Waiau, me Lord's River. Kia tau i nga Komihana nga wawahanga o roto i enei poraka, heoi ko te wa ten a e rite ai aua whenua mo te whakanohonoho ki te tangata."