No te hawhe-paahi i te rua karaka ka huihui te Whare.

Te Whakatuwheratanga O Te Paremete.

Ka tae mai te kupu a te Kawana, he whakahau kia haere ata nga mema ki te Whare o Runga.

Haere ana te Tumuaki me nga mema ki te Whare o Runga, me te haere ano o te Haihana o te Whare i mua i a ratou, a kaore i roa atu kua hoki mai ano ki to ratou Whare.

Nukuhanga O Te Whare.

Ko Te Hetana (Hon. Mr. Seddon).—Ka tu atu ahau ki te motini, ina mutu a tatou mahi i tenei ra, me nuku te Whare ki te Turei e haere ake nei. Kua korero maua ko te kai-arahi i te Apitihana mo tenei putake, a taro ake nei ka takoto he motini ma te Kawanatanga mo runga mo te matenga o Te Pakere (Hon. Sir Patrick Buckley) raua ko Te Rata Porena (Hon. Dr. Pollen), he mema enei tokorua no te Whare o Runga.

Ko Kapene Rahera (Hon. Captain Russell).—Kaore pea te Pirimia i ata marama ki te otinga o ta maua korerorero mo tenei motini. I ki mai te Pirimia ki au tera ia e motini kia nukuhia te Whare, a ki atu ana ahau tera pea e he taua ritenga, ara, kei waiho a muri ake nei hei tauira ma te Whare, otira te mutunga iho ki atu ana ahau ki te Pirimia e kore ahau e whakatete i tana motini. Ko tenei ka whakaae ahau ki tenei motini, engari kaore ahau e pai kia apitiria atu toku ingoa a kia kiia naku tenei motini i whakaae hei tauira ma te Whare i nga tau e takoto ake nei.

Kaore i roa tenei korero, a whakaaetia ana e te Whare te motini a te Pirimia.

Te Whai-Korero A Te Kawana.

Ka tu ake te Tumuaki ka ki atu ki nga mema honore, ara, i runga i te whakarongo ki te whakahau a te Kawana, haere ana tatou kia kite i te Kawana i te Whare o Runga, a pai ana te Kawana ki te whai-korero ki nga Whare e rua o te Runanga Nui, a kia tino marama ai ta tatou titiro i nga korero a te Kawana kua haria mai e au he tauira o ana kupu i whakapuaki ai, a ka whakatakotoria e au taua tauira ki runga ki te teepu o te Whare.

Ka mutu tera ka korerotia ko tetahi motini, i muri i tera ka tu ake te Pirimia me te kai-arahi i te Apitihana, a ka whai korero raua mo te matenga o Te Pakere (Sir Patrick Buckley) raua ko Te Rata Porena (Hon. Dr. Pollen), ka mutu a raua korero nukuhia ana te Whare mo te Turei.

page 22

No te tekau meneti te paahitanga o te wha karaka i te ahiahi ka hiki te Whare.