Nga Korero Paremete: 1896-1899
Turei, te 22 o Hepetema, 1896. — Pitihana A Hone Hikana Kahuti
Turei, te 22 o Hepetema, 1896.
Pitihana A Hone Hikana Kahuti.
Ripoata a te Komiti mo nga Mea Maori, mo runga mo te Pitihana Nama 32 a Hone Hikana Kahuti:—
"Kua ata whiriwhiria e te Komiti te Pitihana a Hone Hikana Kahuti, kua tukuna atu hoki ki a Tiati Make nana ra i whakawa, a i te mea kua ata tirohia te pukapuka mai a Tiati Make, e apitiria nei ki tenei, kaore te Komiti e ahei ki te ki atu me whakahaere ano he tikanga mo, ana take.
"H. Wiremu, Tiamana."
"Ki te Tiamana o te Komiti mo nga Mea Maori o Te Kaunihera.
"Mo runga mo te Pitihana a Hone Hikana Kahuti mo te whakatau a te Kooti i te tau 1887 mo nga paanga o Tiemi Kahuti me Kataraina Kahuti.
"E penei ana nga tikanga, ara:—I te wa i tu ai te Kooti i Waikouaiti, i puta te tono kia whakaturia nga kaiwhakakapi mo Kerei Kahuti me Katarina Kahuti ana teina.
"Kua mate ke aua tamariki i mua atu o te matenga o to raua matua o Kerei Kahuti, no reira i tau ai o raua paanga ki a ia, a no te matenga o Kerei Kahuti i te 16 o Aperira 1880, kua tau atu ki a ia o raua hea, hui ata ki tona hea ake. I tuhia ano te Wira a Kerei Kahuti i te 15 o Aperira 1880, waiho iho ana e ia ona paanga i te Rahui o Waikouaiti ki a Hoani Hikana Kahuti, me Katarina Hape, me Karakatu (Irihapeti Karakatu ara Peti Haimona) whakaturia ana ko Tame Parata, ko Ramiera Erihana me Hona Pauahi nga Kai-tiaki.
"No te tononga ki te Kooti i te 24 o Pepuere 1887 kia whakaturia nga kaiwhakakapi mo Kerei Kahuti, ka tae atu a Tame Parata tetahi o nga Kaitiaki, ka whakaatu atu i te wira, ka tono ki te Kooti kia whakamana te wira i runga i nga tikanga o te Tekiona 44 o "Te Ture Kooti Whenua Maori, 1886," a peratia ana, a i te mea kua tau ki a Kerei Kahuti nga paanga o ana tamariki i mua atu o tona matenga, i pa atu te mana o tana wira ki tona hea ake me nga hea ano hoki o aua tamariki, koia nei nga take i pera ai te whakatau a te Kooti e whakahengia nei e te Kai-pitihana.
"A. Make."