No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka panuitia tuatahitia etahi Pire, ka whakahaerea etahi atu mahi, a ka tae ki nga patai. Ka maha nga patai kua whakahaerea, ka tae ki te patai mo te—

Mana Hoko Whenua Maori.

Ko Te Hutana (Mr. Houston).—Ka patai ahau ki te Minita mo te Taha Maori, mehemea ranei tera e whakatikatikaina e ia te Ture Kooti Whenua Maori i paahitia nei i tera huinga o te Paremete, ara, i tangohia nei e te Kawanatanga, i raro i taua Ture, ki a ia anake te mana o te hoko me te riihi i nga whenua o te Maori? Te take i ui ai ahau i tenei patai he whakaaro noku ki nga hiahia o nga Pakeha me nga Maori hoki o toku ake takiwa tae atu hoki ki te motu katoa o Aotearoa, ara, he nui no te mate kua pa ki nga iwi e rua i runga i tenei tikanga o taua Ture, i tangohia nei e te Kawanatanga ki a ia anake te mana mo te hoko mo te riihi ranei i nga whenua Maori. Ko toku hiahia me hurihuri e te Minita tenei putake, a tera pea e kitea e ia he huarahi e taea ai te whakatikatika taua Ture o tera huinga o te Paremete, a e mahea atu ai tenei mate kino kua pa nei ki nga iwi e rua i runga i taua Ture.

Ko Timi Kara (Hon. Mr. Carroll).—I runga i nga tikanga e whakahaerea nei e te Kawanatanga, e puta ai he painga mo te iwi katoa o te koroni, e kore e marere i te ringa o te Kawanatanga taua mana kua tangohia nei e ia. page 15Kaore ano i whai-taima e kitea ai nga painga mo te iwi kei roto i taua Ture, e kitea ai ranei ona kino. Ka ata kimihia ano e ta Kawanatanga nga wahi taratara o taua Ture, a, ana kitea, ka ata hurihuria e ratou he tikanga e taea ai te whakangawari o nga wahi uaua.

Nga Maori O Te Waipounamu Me Rakiura.

Ko Tame Parata.—Ka patai ahau ki te Minita mo nga Mea Maori, ahea ranei oti ai i nga Komihana te whakatau i nga wahi mo nga Karauna karaati mo nga whenua ka hoatu nei mo nga Maori me nga hawhe-kaihe kore whenua o te Waipounamu me Rakiura?

Ko Te Makenehi (Hon. Mr. J. McKenzie).—Ko taku utu atu mo te patai e penei ana, kaore i taea e nga Komihana te whakaoti o ta ratou mahi i tenei tau, engari ko taku hiahia me tino whakaoti e aua tangata taua mahi i roto i nga marama e toe nei o tenei tau.

Nga Maori O Waitaki Me Waihao.

Ko Tame Parata.—Ka patai ahau ki te Minita mo nga Mea Maori, mehemea ranei kua whakaturia he takuta mo nga Maori o Waitaki me Waihao; a mehemea kaore ano, me whakaatu mai e ia te take o te roa?

Ko Timi Kara (Hon. Mr. Carroll).—Ka nui toku koa ki te whakaatu kua whakaturia ko Takuta Pakere (Dr. Barclay) he tangata hei tiaki a hei rongoa i nga Maori o Waitaki, a ko Takuta Karana (Dr. Garland) he tangata tiaki i nga Maori o Waihao.