Te Pire Whakatikatika I Nga Ture Mo Nga Whenua Maori.

Ka tahuri te Whare ki te Komiti i te Pire, mahi tonu a oti noa, katahi ka ripoatatia.

Kua tu atu te Tumuaki ki te motini kia panuitia tuatorutia te Pire.

Ko Hone Heke.—E te Pika, e kore e roa rawa aku korero. E hiahia ana ahau ki te whakaputa i oku whakaaro mo runga i tenei Pire kua paahitia nei e tatou. Ahakoa a maua nei tautohetohe ko te Pirimia mo nga ture e pa nei ki te motu nei, he mea tika kia whakamoemiti atu ahau ki a ia mo nga mea kua homai e ia ki nga Maori i roto i tenei Pire, ahakoa kaore i tino tutuki ki ta toku ngakau i whakaaro ai, kaati tonu, he nanakia te rahi o nga whakangawaritanga kua kinitia mai e ia hei ora mo te taha Maori. Ahakoa he taha ke toku he taha ke to te Pirimia i roto i tenei Whare, kaore e waiho e au tera hei take e kore ai au e whakamoemiti atu kia a ia. Tera ano te Pirimia, a ko ake nei, e mohio ehara taku e whakatete nei i a ia i te mea he ngakaukino noku ki a ia. Kaore e kore te puta ake o tenei mea o te ngangare i roto i nga mahi o te Paremete, na reira ahau e tu atu nei ki te whakamarama i toku ahua mo nga ture e mahia nei mo te taha Maori. Ko tekiona 4 o te Pire, he tekiona pai tena, heoi tona wahi i kino ko te waihotanga o te mana i roto i te ringaringa o te Kawana me tana Kaunihera. Ki toku nei whakaaro ehara a tekiona 5 i te tekiona marama, tera e purua e taua tekiona te whakanohonoho o nga whenua o Aotearoa, ara o te pito ki Akarana.

Tenei ano te roanga atu o nga korero a Hone Heke, ara, he tohutohu haere nana i nga wahi he me nga wahi uaua o te Pire.

Ka mutu a Hone Heke ka tu ake ko Te Pukanana (Mr. Buchanan), ko Te Kere (Mr. W. Kelly) a ko Te Hetana (Hon. Mr. Seddon) te Minita mo te taha Maori.

No te mutunga o ta enei ka panuitia tuatorutia te Pire.

No te tekau meneti ki te rua karaka i te po ka hiki te Whare.