Pire Mo Te Peeke O Niu Tireni.

No tenei ra ka tae mai ki te Whare nga menemana a te Whare o Runga mo tenei Pire.

Ka tahuri te Whare ki te hurihuri i nga menemana a te Kaunihera. He maha nga mema i whai-korero mo tenei putake. Ka mutu era ka tu ake.

Ko Hone Heke.—Ki taku mahara kua hoki nga whakaaro e etahi o nga mema honore, a kua mea ratou, he pai rawa mehemea kaore i whakaturia te Komiti hei uiui i te ahua o te takoto o nga niahi me nga toenga o nga rawa o te peeke nei. No te tuatahi mai ano toku mohio kaore kau he ritenga e whakaturia ai taua Komiti. Inaianei kua penei hoki me toku te whakaaro o etahi o nga mema honore, a kua kite ratou i te he o te whakaaetanga a te Whare nei i tera tau o te rua miriona pauna moni ma te peeke; mehemea i tera tau, i penei me to naianei to ratou mohio kihai i utaina e ratou taua kawenga taumaha ki runga ki nga pakihiwi o nga tangata e utu nei i nga taake o te koroni. Ki taku kaore auo i tureiti, ka taea noatu e tatou inaianei te whakamutu o tenei korero, a te ruke atu i tenei Pire; a he pai rawa kia peneitia e tatou, kei waiho tenei mea hei mate mo ta koroni i roto i nga tau e takoto ake nei. No te timatanga mai ano o nga mahi a te Whare nei mo tenei peeke ka ara taku pakanga mo tenei Pire, a e kore e mutu taku whakatete. Ki te paahi tenei Pire tera e eke ki te rima miriona me te rima rau mano pauna nga moni e utaina e tatou ki runga ki nga iwi o te koroni nei. Ki taku he pai rawa kia rukea atu tenei Pire ki waho o te Whare nei a me mutu ta tatou tautoko i tenei peeke, engari me waiho atu kia pakaru.

Tenei ano te roanga atu o tenei whaikorero a Hone Heke kei nga pukapaka reo Pakeha o te Paremete.

Heoi no etahi ra i muri iho tau ana nga tautohetohe a te Whare raua ko te Kaunihera mo tenei Pire. a paahitia ana taua mea hei ture.

Kaitangiwhenua Poraka.

Ko Te Makuaea (Mr. McGuire).—Ka patai ahau ki te Pirimia, mehemea ranei ka whakaae ia ki te whakahau kia perehitia, a kia whakatakotoria ki runga ki to teepu o te Whare, te kupu whakahoki a Wiremu Wiremu mo te ripoata a Tiati Katera mo Kaitangiwhenua Poraka, kia mohio ai nga mema honore ki te ahua o taua mea? Kua rongo ahau kua tae atu ki te Pirimia te kupu whakahoki mo te ripoata a Tiati Katera, a, e hiahia ana ahau kia whakatakotoria taua mea ki runga ki te teepu o te Whare.

Ko Te Hetana (Hon. Mr. Seddon).—Kua whakatakotoria ki runga ki te teepu o te Whare te tauira o taua kupu whakahoki—no te huihuinga o te Paremete o tera tau i vrhakatakotoria ai.

Ko Te Makuaea (Mr. McGuire).—I perehitia ranei?

Ko Te Hetana (Hon. Mr. Seddon).—Kaore; i whakatakotoria noatanga iho ki runga ki te teepu.

Nga Maori O Buller.

Ko Tame Parata.—Ka patai ahau ki te Minita mo te taha Maori, mehemea ka whakaae ia ki te tuhituhi atu ki a Takuta Maketanara (Dr. McDonnell), he ui atu mehemea ranei ka pai ia kia whakaturia ko ia hei takuta tiaki i nga Maori o te takiwa o Buller, kei Te Waipounamu?

Ko Timi Kara (Hon. Mr. Carroll).—Kaore ano he pukapuka i tae mai ki te Tari mo runga i taua putake. Ko te mea pai ma etahi o nga Maori o taua takiwa e tuku mai he kupu ki te Kawanatanga, me te ata whakaatu mai i nga mea katoa e pa ana ki taua mea, a me te whakaatu mai hoki i te nui o ta ratou nei moni e kaha ai ki te kohikohi hei tautoko i te utu mo taua takuta.