No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka panuitia tuatahitia te Pire Taiapa me te Pire mo Tongariro Paaka mo te Iwi Katoa.

Ka mutu enei Pire te panui e te Whare ka whakahaerea ko etahi patai. Ka mutu era, ka tae ki te patai mo:—

Horowhenua Poraka.

Ko Te MiTerehana (Mr. Mitchelson).— Ka patai ahau ki te Minita mo nga Whenua. (1.) I hokona mai i a wai te 1,500 eka o Horowhenua Poraka? (2.) Mehemea ranei kua utua atu e te Kawanatanga te moni mo taua whenua, tetahi wahi ranei o te moni? (3.) Mehemea ranei kua hainatia nga pukapuka tuku i taua whenua ki te Kawanatanga? (4.) Mehemea kaore ano i whakawhitia te whenua ki te Karauna, kei te pehea te ahua? (5.) Mehemea i utua taua whenua ki te moni, i pehea ranei te ritenga o te utunga—i puta a moni koura, pehea ranei? (6.) A mehemea i utua a moni, i hoatu ki a wai te moni? He maha nga mema kei te mohio i tae tenei putake ki te aroaro o te Komiti mo nga Mea Maori i ia tau, i roto i nga tau e wha e rima ranei kua pahure ake nei. Mehemea he pono kua hokona mai taua whenua e te Kawanatanga he mea tika kia puritia te moni e te Kawanatanga kia tau ra ano nga raruraru o taua whenua i te Whare, a kia mohiotia ra ano he kai-tiaki ranei, kaore ranei, a Warena Hunia me Meiha Keepa mo te iwi katoa e whai paanga ana ki taua whenua. (Tena ano te roanga atu o nga korero a Te Miterehana.)

Ko Te Makenehi (Hon. J. McKenzie, Minita mo nga Whenua).—Ki taku mahara i whakahokia ano e ahau he utu mo tetahi patai penei te ahua i tera huinga o te Paremete, a i ki atu ahau i reira, ka ata uiuia mariretia taua mea i mua o te utunga atu o nga moni. Ko taku utu atu inaianei mo tenei patai, koia tenei, ko taua poraka whenua he mea hoko ia Warena Hunia, a kei te Kawanatanga katoa te moni e pupuri ana. Kua tino tuturu ki te Kawanatanga taua piihi whenua inaianei, a kaore ano te moni i utua atu ki te tangata.

Ko Te MiTerehana (Mr. Mitchelson).— He patai atu ano naku mehemea ranei ka whakaarohia e te Kawanatanga tetahi ritenga e paahitia ai tetahi ture e tenei huinga o te Paremete e tino tau ai nga raruraru o Horowhenua, ara e mohiotia ai he kai-tiaki ranei a Warena Hunia me Meiha Keepa mo te iwi, kaore ranei.

Ko Te Makenehi (Hon. J. McKenzie).— Ka ata hurihurihia e ahau tena mea i mua o taku whakahokinga atu i te patai.