Pire Mo Te Ngaere Me Etahi Atu Poraka.

Ko Te Makenehi (Hon. Mr. J. McKenzie).—I motini ia kia panuitia tuaruatia tenei Pire, ko te tikanga o taua Pire he whakatikatika mo etahi raruraru i pa ki tetahi whenua i hokona e te Kawanatanga i nga Maori, ko Te Ngaere te ingoa o taua whenua.

Ko Hone Heke.—I tautoko ia i tenei Pire, i pai ia kia paahi, notemea he tikanga marama tera. Ka pai rawa ki a ia mehemea ka whakaurua atu e te Minita etahi atu poraka e takoto raruraru ana ki roto ki taua Pire. Tenei ano te roanga atu o ana korero.

Ko Tame Parata.—Ki tana whakaaro me tuku atu tenei Pire ki te Komiti mo nga Mea Maori. Koira te huarahi tika. Ehara tana i te turaki i te Pire, heoi tana he tono kia tukuna atu te Pire kia whiriwhiria e te Komiti.

Ko Timi Kara (Hon. Mr. Carroll). —I whakaatu ia ki te Whare kua maha nga taenga o tenei mea ki te aroaro o te Komiti mo nga Mea Maori, a kua page 26pau katoa ona tikanga te whiriwhiri e taua Komiti, a ki te whakaaro a taua Komiti, mehemea ka hokona taua whenua e te Kawanatanga me pupuri nga moni, a me mahi he ture e te Whare kia whai mana ai te Kooti Whenua Maori ki te whakawa i taua whenua, a ki te kimi kowai nga tangata ma ratou nga moni.

Ko Te Hetana (Hon. Mr. Seddon). —Ki tana whakaaro he turikore rawa te mahi a te Komiti mo nga Mea Maori, a mehemea e mea ana ratou kia mate tenei Pire, koia tera te huarahi e mate ai me tuku atu ki te Komiti. Otira kua tino whiriwhiria tenei Pire, kei te mohiotia katoatia ona tikanga, a kaore kau he mea kino o roto. Heoi ano nga poraka e pa ai taua Pire ko nga whenua e mau nga ingoa i te Rarangi Apiti ki te Pire.

Heoi paahitia ana te Pire e te Whare.